Muzey 1984-jılı Úshsay port posyolkasında shólkemlestirilgen bolıp, 1998-jılda Moynaq rayonınıń Mádeniyat úyine kóshirilgen. 1980-jılları doktor Esirkepov tárepinen jıynalǵan muzey kollektsiyası Moynaq hám Aral teniziniń tariyxınan dárek beredi. Ol milliy kiyim-kenshek, ertedegi zergerlik bezeniw buyımları, úy-ruwzıgershilik buyımları, qayıqlar hám de balıqshılıq aw-quralları, haywanlar menen quslardıń tulıpları, sonday-aq arxiv fotosúwretlerinen ibarat.
Xudojnikler Rafael Matevosyan hám Faim Madgazinniń jivopislik kartinalarınan ibarat bolǵan XX ásir 60-70-jılları jivopisi toplamınıń teńi-tayı joq. Kóbinese bul xudojniklerdi «Aral jivopisshileri» dep ataǵan, óytkeni búgingi kúni tariyxıy hám kórkemlik qunǵa iye bolǵan shıǵarmalarında olar regionnıń hám de Araldıń siyrek ushıraytuǵın gózzallıǵı, sonday-aq kók Araldıń shólistanlıqqa aylanǵanı tuwralı sóz etken.