Erli-zayıplı Ámet hám Ayımxan Shamuratovlardıń jeke menshik úy-muzeyi 1999-jılı olardıń perzentleriniń qarjılandırıwında dúzilgen. Ámet Shamuratov (1912–1953-jj.) – jazıwshı, shayır hám dramaturg, al onıń zayıbı Ayımxan Shamuratova (1917–1993-jj.) – xalıq artistkası, Qaraqalpaqstan tariyxında teatr saxnasına shıqqan dáslepki hayal-qızlardıń biri bolǵan. Olar XX ásir qaraqalpaq mádeniyatınıń rawajlanıwında aytarlıqtay rol oynadı. Muzey kollektsiyası erli-zayıplılardıń jeke zatları: saxna kiyimleri, fotosúwretler, qoljazbalar, kitaplar, xatlar, eski buyımlardan ibarat. Sonday-aq, bul jerde Qaraqalpaqstannıń ataqlı jazıwshıları, artistleri hám mámleketlik iskerleriniń fotohújjetleri jáne F. Madgazin, R. Matevosyan, Q. Berdimuratov hám t.b. belgili xudojniklerdiń kartinaları saqlawlı tur. Muzeyde Ayımxan Shamuratovanıń atqarıwındaǵı qosıqlardı tıńlawǵa boladı.