XIX ásirde qaraqalpaqlar óksheli, qattı ayaq kiyim kiygen. Erkekler úyden shıǵarda aq pushta, yamasa báykem etik (ókshesi bar etik) kiygen, ushı súyir, bas beti joqarı qarap qayırılıp turatuǵın bul etik iylengen teriden islengen. Qattı suwıqta keń etiklerdiń ishinen aq kiyizden islengen shulıq kiyiletuǵın bolǵan. Jaz kúnleri atta júriw ushın erkekler qara mal terisinen islengen biyik óksheli tufli kiygen. Hayal-qızlar bas beti joqarı qarap qayırılıp turatuǵın, kesteli yaki jasıl qondırma naǵısları (applikatsiya) bar óksheli qızıl etik kiygen. Sonday-aq, sımnan naǵıs salınǵan óksheli tufliler de bolǵan. Balalar qıstıń kúnleri teri yamasa kiyizden islengen ápiwayı etik, jazda – shepek (sandaliya) kiyetuǵın bolǵan.
Qaraqalpaqlardıń jazda kiyetuǵın ádettegi ayaq kiyimi – teriden islengen gewish bolǵan. Suwıq kúnleri gewishti mási (teriden islengen, jumsaq ultanlı musılmanı etikler) menen, ishinen shılǵaw orap kiyetuǵın bolǵan.