Qaraqalpaqlardıń ertedegi erkekler kiyimi koloritiniń qatańlıǵı menen ózgeshelengen hám qońsılas xalıqlar kiyimleri menen uqsas bolǵan. Erkekler kiyimine taqıya, jún malaqay, kóylek, dambal, kamzol, shapan, belbew, ayaq kiyim hám basqalar jatadı.
XIX ásirde erkekler bórik kiygen, ol forması jaǵınan áyyemgi skiflerdiń bas kiyiminen kelip shıqqan. Bórik qara qiyizden konus formasında, ushı qayırılıp turatuǵın etip islenetuǵın bolǵan. Qaraltım reńdegi, qoy terisinen júni sırtqa qaratıp tigiletuǵın shógirme, túlki terisinen tigilgen, qulaqshını bar hám jelkeni jawıp turatuǵın malaqay, sukno yamasa maqpaldan tigilip, júnli jiyek salınǵan degeley de ertedegi bas kiyimlerdiń túrleri bolǵan. Qarakól teriden tigiletuǵın telpek bas kiyimniń jáne bir túri bolǵan. Erler bas kiyimniń ishinen taqıya kiygen. Onıń gúmbez tárizli forması tórt bólekten quralıp, dógeregi basqa tawardan qoyılǵan hám jiyeklengen. Kóp sandaǵı shapanlardan túye júninen úyde tayarlanǵan suknodan tigilgen keń shekpenler erkekler arasında kóp tarqalǵan. Shekpen hám postınnıń ózgesheligi – arqasında úshmúyeshlik formasındaǵı kestelengen tumarınıń bolıwı. Tumar adamnıń arqa tárepi ázzi, qorǵaw qıyın bolıwı haqqındaǵı túsinikler menen baylanıslı bolıp, ertede adamnıń oq jay salınǵan sadaqtı arqasında alıp júriwge ádetleniwinen kelip shıqqan. Úshmúyeshlik — Quday-Ananıń áyyemgi simvolı bolıp, usınıń menen birge oq jaydıń ushı – jawız kúshlerden qorǵawshı nıshandı bildirgen.
Erkekler belin belbew menen baylawı shárt bolǵan (belbew onıń abıroyı hám kúshiniń nıshanı bolǵan). Oramal kúndelikli turmısta belbew bolıp xızmet etken, bayramlarda bolsa erkekler jipek belbew baylaǵan. Qurǵın xojalıqtıń erkekleri qara mal terisinen islengen qamarı belbew taǵatuǵın bolǵan. Olar gúl (трилистник), jolbarıstıń bası hám pánjesiniń súwreti bar gúmis toǵalar menen bezelgen. Teriden islengen, bir qatar dizbekleri bar jińishke belbewler de bolǵan. Bunday belbewler ańshılar ushın tán bolǵan hám dalada kún keshiriw ushın zárúr bolǵan kese, oq dári, shaqmaq tas hám basqa da zatlar ushın qaltashalar menen tolıqtırılǵan.