Qaraqalpaqstannıń haywanat dúnyası oǵada bay hám kóp túrli. Ol omırtqalı haywanlardıń 498 túri, sonıń ishinde – sút emiziwshilerdiń – 68, quslardıń – 307, jer bawırlawshılardıń – 33, jer-suw haywanlarınıń – 33 hám balıqlardıń – 49 túrin óz ishine aladı.
Qaraqalpaqstan faunası óz ózgesheliklerine iye. Atap aytqanda, shólistanda jasawshı haywanlar eń juwırǵısh haywanlar esaplanadı. Mısalı, shártli ráwishte áste qıymıldawshı haywanlar – kirpitikenlerden bul jerde uzın qulaqlı hám uzın tikenli túrleri ushırasadı, Evropa kirpitikenine qaraǵanda, olardıń ayaqları ádewir uzınıraq.
Sút emiziwshiler arasında eń keń tarqalǵanları – jińishke barmaqlı balpaq tıshqan, qosayaq tıshqan, qasqır, dońız, túlki hám qoyan; quslardan – seksewil soykası, shól shımshıǵı, hákke; jer bawırlawshılardan – kesirtkeler, shól buwma jılanı, balıqlardan — aq amur, Ámiwdárya foreli, sazan, sudak, jılan bas, aq dóńmańlay hám t.b.
Omırtqalı haywanlarǵa salıstırǵanda, shama menen 7 ese kóp bolǵan omırtqasız haywanlar túrlerinen falangalar, shayanlar, shól tarantulı, qońızlar tarqalǵan. Sonı atap ótiw kerek, bul jerdegi jánlikler túrleriniń ráń-báreńligi menen kózge taslanadı — 1392.
Sońǵı on jıllıqta haywanat túrleriniń sanı qısqardı. Mısalı, haywanlardıń 63 túri Ózbekstannıń Qızıl kitabına kirgizilgen (2003-j.). Ataqlı Aziya gepardı hám Turan jolbarısı sút emiziwshilerdiń joq bolıp ketken túri retinde Xalıq aralıq tábiyattı qorǵaw awqamınıń (XTQA) Qızıl dizimine kirgizilgen. Indiya palxorı, túrkmen karakalı (túrkmen qaraqulaǵı), túrkmen qulanı, Ústirt qoshqarı sıyaqlı sút emiziwshiler bolsa, pútkilley joq boldıp ketiw sheginde turǵan túrler sıpatında XTQA nıń esabına alınǵan. Sonday-aq, joq bolıp kiyatırǵan bir qansha quslar (súyir tumsıq shegejin (мраморный чирок), aq tırna (стерх) hám t.b.) menen balıqlar (úlken hám kishi Ámiwdárya jalǵan sumırayları (лжелопатонос) hám basqalar) XTQA diziminen orın alǵan.