Ashıq aspan astındaǵı kemeler muzeyi (Kemeler qoyımshılıǵı) bir waqıtları Moynaq qalasında bolǵan porttıń ornında júzege kelgen. Qashanlardur Aral teńiziniń aydınında júzip júrgen balıqshılıq sudnoları hám barjalar kereksiz bolıp qalǵanlıqtan, tat basıp ketken hám bir payıtları asaw bolǵan teńizdiń ultanında máńgige toqtap qalǵan.
XX ásirdiń 30-jılları dúzilgen Moynaq qalasınıń tariyxı balıqshılıq penen tıǵız baylanıslı. Ol Aral teńiziniń jaǵasında jaylasqan edi, búginliginde bolsa teńiz Moynaqtan bir neshe júz kilometrge qashıqlaǵan. Qala tek ǵana Oraylıq Aziyadaǵı eń iri balıqshılıq óndirisi menen emes, sonday-aq ájayıp plyajları hám balalar ushın dem alıs orınları menen de at shıǵarǵan edi. Házir usı orınlarda kólemi boyınsha dúnyada úshinshi bolǵan Aral qum shólistanlıq keńisligi payda bolǵan.
Búgingi kúni Ashıq aspan astındaǵı kemeler muzeyinde 10 nan sál artıq kemeni kóriw múmkin, bir waqıtları bolsa olar 100 den de kóp bolǵan.