Ózbekstan Kórkemlik akademiyasınıń Qaraqalpaqstan bóliminiń xızmeti Qaraqalpaqstannıń súwretlew kórkem óneri hám de qol ónerin rawajlandırıw jáne de keńnen en jaydırıwǵa baǵdarlanǵan. Bólimniń imaratında kórgizbe zalı, kitapxana, Qaraqalpaqstan xudojnikleri dóretpeleriniń fondı hám Ónermentshilikti rawajlandırıw orayı jaylasqan. Kórgizbe zalında hár jılı 20 dan aslam kórgizbeler, master-klasslar, konkurslar, festivallar hám t.b. ótkerilip turadı.
UNESCOnıń qollap-quwatlawında dúzilgen Ónermentshilikti rawajlandırıw orayı Qaraqalpaqstannıń dástúriy ónermentshiligin qayta tiklew, saqlap qalıw, keńnen en jaydırıw hám rawajlandırıwǵa baǵdarlanǵan. Onda sheber jas hayal-qızlar gilem toqıw, keste toqıw, qara úydiń jasawların tayarlaw hám basqa da bir qansha baǵdarlarda jumıs alıp baradı, sonday-aq Qaraqalpaqstan hám Ózbekstannıń jetekshi ónermentshileri tárepinen hár qıylı oqıw programmaları júzege asırıladı.