Qaraqalpaqlardıń milliy asxanasında qamırdan islengen hám de daqıllardan tayarlanǵan taǵamlar kóp. Mısalı, gúrtik – júweri unınan tayarlanatuǵın góshli taǵam. Júweri unı, duz, qaynaǵan ıssı suwdan qamır qarıladı. Onnan domalaq tárizdegi gúrtik soǵıladı, gúrtikte barmaqtıń izleri qalıp qoyadı. Gúrtikti góshli sorpada qaynatıp, pisirip aladı. Tayar bolǵan gúrtik súzip alınıp, ústine piyazlı duzlıq hám gósh salınadı.
Biyday unınan shórek tayarlanadı. Úlken tabaqlarda qamır iylenip, soń oqlaw menen jayıladı ham qızıp turǵan tandırda jawıladı. Sonday-aq, usınday qamırdan juqa etip jayılǵan hám mayda etip kesilgen tórt múyeshli qamır bólekleri – bawırsaq, hám qamırı qol menen sozılıp, mayǵa quwırıp alınatuǵın úlken «shórekler» – sozban da pisiriledi. Biyday unınan eki túrdegi lapsha: kespas hám qaysas tayarlanadı. Kespas ushın júdá juqa jayılǵan qamır bir shetinen trubka tárizinde oraladı hám mayda lapsha etip kesiledi. Oǵan ashshı yaki dushshı qatıq qatıladı. Qaysas ta usılayınsha tayarlanadı, biraq oǵan may qatıladı.
Aq sawlaq tayarlaw ushın biyday unınan iylengen qamır zuwalası juqalap jayıladı hám qızıp turǵan qazanda pisirip alınadı. Oǵan qatıq yaki sarı may qatıladı. Aq sawlaq toyǵa shekem aldın-ala tayarlanıp, keptirip qoyılıp, soń góshli sorpa menen tartılsa da boladı.
Máyek bórek – qaraqalpaqlardıń belgili taǵamlarınan. Jayılǵan qamır kishilew kvadrat tárizinde kesilip, konvert formasında búgiledi, onıń ishine kúydirilgen may hám jaqsılap aralastırılǵan máyek quyıladı. Qazandaǵı mayǵa piyaz quwırıp alınadı hám suw quyıladı. Suw qaynawdan, qazanǵa máyek bórek salınıp, pisirip alınadı.
Dárya hám teńiz jaǵalawlarındaǵı rayonlarda derlik barlıq taǵamlar balıqtan tayarlanatuǵın bolǵan. Solardıń arasında qarma – bul júweri yaki tarı unınan tayarlanǵan gúrtik salınǵan sorpa, yaki quwırılǵan yamasa duzlanǵan balıq (sársem balıq) bar.
Qawın, ǵarbız, qabaqlar keptiriledi hám áwesekke jelinedi.