Qorǵasın qala (b.e.sh. IV–III áá.) Jambas qala esteliginen batısında, 17 km qashıqlıqta jaylasqan. Qala tuwrımúyeshlik formasında joybarlastırılǵan bolıp, onıń jaqsı saqlanıp qalǵan diywallarınıń biyikligi bazı jerlerde 14-16 metrge jetedi. Diywallar tómengi jaǵında paqsadan islengen, onnan keyin tamǵası bar kvadrat gerbishten órilgen. Múyeshlerdegi qarawıl tóbelerdi esaplamaǵanda, diywallar uzın jerlerinde úsh qarawıl tóbe, keltelew jaǵında bolsa bir-birden salınǵan qarawıl tóbe menen nıǵaytılǵan. Túslik-batıs jaqtan tısqarı, qorǵan hámme tárepten baryer diywalı menen qorshalǵan.
Qorǵan Áyyemgi Xorezm mámleketiniń ishki rayonların dala qáwimlerniń shabıwılınan qorǵap turǵan bolıwı múmkin. Qorǵannıń ataması túrkshe «qorǵasın» sózinen kelip shıqqan bolıp, usı orınnan onsha qashıq bolmaǵan jerden qorǵasın alınǵan, degen pikirler bar.