Shılpıq (I–IV, IX–XI áá.) Nókis qalasınan túslikke qaray 43 km qashıqlıqta, Ámiwdáryanıń oń jaǵasındaǵı tóbelikte jaylasqan. Zoroastrizm dástúri boyınsha, ólilerdiń denesi usı jerge ákelinip, súyeklerdiń sırtqı etli qatlamnan tazalanıwı ushın qoyılǵan. Ápsanaǵa qaraǵanda, erte zamanlarda jası qaytqan ǵarrılardan waz keship, olardı tawda qaldırıp ketiw úrdiske aylanǵan eken. Bir kúni Shılpıq degen jas jigit te ákesin tawǵa aparıp taslamaqshı bolıptı. Ol tawǵa shıǵıp baratırıp, dem almaqshı bolıp bir tastıń ústine otırıptı. Sonda ákesi kúlip jiberipti. Shılpıq: «Nege kúleseń? Men seni tóbege aparıp taslayjaqpan-ǵoy?» dep soraptı. Ákesi: «Men de ákemdi alıp kiyatırıp, usı jerde dem alıp edim, sol yadıma túsip ketti» dep juwap beripti. Shılpıq ákesin aparıp taslaw oyınan qaytıp, onı úyinde jasırın túrde saqlaptı. Bunday is-háreketi ushın Shılpıqtı ólim jazasına buyırıwı múmkin edi.
Bir kúni sol eldiń patshası awırıp qalıptı. Hámme jerden táwip shaqırılǵan bolsa da, hesh qaysısı patshanı emley almaptı. Sonda Shılpıqtıń ákesi bir shóptiń atın aytıp, patsha sol shóptiń suwın ishse jazılıp ketedi, dep másláhat beripti. Balası bunı patshaǵa barıp aytıptı. Shóptiń suwınan táwir bolǵan patsha Shılpıqtan bul ájayıp shóp haqqında qayaqtan bilgenine qızıqsınıptı. Ol: «Bir qasıq qanımnan keshseńiz, sırımdı aytaman» dep juwap beripti. Patsha razı bolǵannan soń Shılpıq: «bunı jasırıp baǵıp otırǵan ákem aytqan edi. Eger de bunı bilip qalǵanıńızda, meni ólim jazası kútip tur edi» depti. Bunnan soń patsha «Endigiden bılay ǵarrılar tawǵa aparıp taslanbastan, óz ájeli menen ólgenge shekem baǵılsın» dep buyrıq bergen eken.