Qaraqalpaqlar hár qıylı texnika boyınsha islengen teri buyımların keńnen paydalanıp otırǵan. Terige naǵıs oyıwda záńginiń astına qoyılatuǵın tebingide ayrıqsha kórkemlikke erisilgen. Onı qálipke salıp batırıp, kishigirim shtamp menen islew bergen, soń naǵıs oyılǵan (gravirovkalaǵan). Burınları súyekten naǵıs salınıp, teriden islengen at erleri – aq baslı er oǵada ájayıp bolǵan. Terige keste toqılǵan, mısalı: erdiń astına qoyılatuǵın jipek jona – jipek penen, kese-sháynek salınatuǵın shını qap, ayaq kiyimnen zerli gewish – mıs sım menen kestelengen. Applikatsiyalıq (qondırma) naǵıs kóbinese un, dán, sók salınatuǵın uzın, trapetsiya tárizli shanashta islenetuǵın bolǵan. Shanashtıń negizi iylengen teriden yaki aq tawardan tayarlanǵan. Applikatsiya ushın kóbinese qara sukno yamasa teri bóleklerinen paydalanılǵan. Naǵıslar geometriyalıq yamasa múyiz tárizli kóriniste bolǵan.