Ámiwdáryanıń eski ańǵarınıń boyında jaylasqan Aqshaxan qala (b.e.sh. III á. – b.e. VI á) – Áyyemgi Xorezmniń eń iri hám eń quramalı, kózge túserlik esteliklerinen bolıp, onıń basım bólegin qum qaplap ketken. Estelik ismi ápsanaǵa aylanıp ketken jergilikli patsha Aqsha xannıń atına qoyılǵan.
Jobası boyınsha qala kvadrat formasına jaqın, qalanıń múyeshleri dúnyanıń tórt tárepine qaratılǵan. Ol úlken, biraq házir ádewir unıraǵan eki qatar qorǵan diywalları menen qorshalǵan bolıp, diywaldıń hár tárepi boylap bir neshe qarawıl tóbeler bolǵan. Qalanıń túbinde óz maydanı boyınsha onnan bir neshe ese artıp túsetuǵın júdá úlken bekinisli qonıslanıw bar. Ol dálizleri bar eki qatar diywallar menen qorshalǵan bolıp, diywalda ashılǵan oq atıw ushın arnawlı orınları bar qarawıl tóbeler menen nıǵaytılǵan.
Derlik kvadrat kórinisinde jobalastırılǵan qorǵan qarawıl tóbeler hám or menen bekkemlengen qurılıstı (Joqarǵı qala) óz ishine aladı. Sońın-ala ol basqa qorǵan diywalı menen qorshalǵan (Tómengi qala). Qalanıń ekewi de bir-birinen teńdey qashıqlıqtaǵı oq atıw ushın arnawlı orınlar hám qarawıl tóbeleri bar diywallar menen nıǵaytılǵan.
Joqarǵı qalada monumental imaratlardıń qaldıqların kóriwge boladı: tırnaǵı bay áshekóylengen 100 óresi bar ibadatxananıń (yaki gipostil saraydıń) imaratı 60×60 metr bolǵan kvadrat pishiminde. Onıń interyeri ılaydan jasalǵan ornamental naǵıs penen áshekóylengen, dálizlerdiń diywalları boylap házirgi kúni atları belgisiz bolǵan Áyyemgi Xorezm patshalarınıń portretleri hám qanday da bir saltanatlı júristiń kórinisi túrindegi b.e.sh. II ásirge tiyisli ájayıp diywal súwretleri menen qaplanǵan. Basına qus kórinisindegi taj kiygen patshalardıń kim ekenligi ilim ushın ele jumbaq bolıp qalmaqta.
Qorǵannıń dál ortasında imarat (bul mavzoley bolıwı itimal) jaylasqan bolıp, onıń tsilindr tárizli svodınıń qaptallarında kvadrat formasındaǵı eki qarawıl tóbesi bar.