“KARATEREN” ETNO-TURISTIK MAJMUASI
2024-yil 16-oktyabr kuni Qoraqalpog‘iston Respublikasi Taxtako‘pir tumani Dauqara qishlog‘i hududidagi maftunkor Borshitau hududida joylashgan yangi “Karateren” etno-turistik majmuasining tantanali ochilish marosimi bo‘lib o‘tdi.
“Karateren” turistik majmuasi mehmonlari uchun o‘tov shaharchasi va kemping uylari, amfiteatr, bolalar maydonchasi tashkil etilgan.
272 Temir-beton zinapoya Borshitau tepaligining yonbag‘ridan kuzatish maydoniga olib boradi, u yerdan atrofdagi landshaftning ajoyib manzarasi ochiladi.
Turistik majmua mehmonlarni mahalliy madaniyat muhitiga sho‘ng‘ish, uning o‘ziga xos xususiyatlari va an’analarini o‘rganish, musiqa va raqslardan bahramand bo‘lish, milliy taomlar va ichimliklarni tatib ko‘rish, ushbu ajoyib mintaqaning mahalliy merosini yaxshiroq tushunishga yordam beradigan turli tadbirlarda ishtirok etishga taklif qiladi.
Bu hudud tabiat bilan to‘liq birlashish va uning betakror go‘zalligidan bahramand bo‘lishga intiluvchi ekoturizm ishqibozlari uchun juda mos keladi. Bu yerda maftunkor tepaliklar bilan o‘ralgan Karateren ko‘lining ajoyib manzarasi ochiladi. Toza havo, mutlaq sokinlik xotirjamlik va uyg‘unlik hissini beradi, shahar hayotining zo‘riqishlaridan xalos qiladi.
“Bir bo‘lsak – Yagona xalqmiz, birlashsak - Vatanmiz!” shiori ostida o‘tkazilgan ikki kunlik tadbirda keng jamoatchilik va ommaviy axborot vositalari vakillari, madaniyat va san’at namoyandalari hamda xorijiy mamlakatlardan mehmonlar ishtirok etdi. Tantananing asosiy qahramonlari O‘zbekistonning turli burchaklaridan kelgan yoshlar bo‘ldi.
“Karateren” sayyohlik majmuasi xalqlar o‘rtasidagi do‘stlik va milliy birlik ramzidir. O‘zbekiston zaminida o‘zbeklar, qoraqalpoqlar, qozoqlar, turkmanlar, tojiklar, ruslar, tatarlar, koreyslar va boshqa millat vakillari tinch osmon ostida bir oila bo‘lib yashab kelmoqda.
Turistik majmuaning ochilish marosimi doirasida o‘tovlar yonida yoshlar festivali bo‘lib o‘tdi. Festivalning bayram dasturida turli xalqlarning milliy urf-odatlari va an’analarini aks ettiruvchi teatrlashtirilgan kompozitsiyalar, milliy liboslar namoyishi, qishloq xo‘jaligi mahsulotlari yarmarkasi namoyish etildi.
“Karateren” turistik zonasi atrofidagi plenerda rassomlar mahalliy manzaralarning ajoyib etyudlarini yaratdilar.
Ularning rasmlari yorqin ranglarga boy bo‘lib, bu joy tabiatining o‘ziga xos xususiyatlarini aks ettirgan. 
G‘oyalar va tajriba almashish plener dasturining muhim qismi bo‘lib, barcha ishtirokchilar o‘zlarining ijodiy izlanishlari bilan o‘rtoqlashdilar.
Amfiteatrda “Fashion night” nomli turli millat vakillarining liboslari namoyishi va qiziqarli konsert dasturi namoyish etildi.
Sahnada xalq kuylaridan tortib zamonaviy xitlargacha bo‘lgan turli uslubdagi musiqiy kompozitsiyalar yangradi. Festival ishtirokchilari o‘zining go‘zal vokal chiqishlari, sho‘x raqslari va yorqin xoreografik sahna ko‘rinishlari bilan tomoshabinlarni hayratda qoldirdi. Kechki konsert dasturi taassurotlarga boy mushakbozlik bilan yakunlandi.
Maftunkor tabiat manzarasi orasida joylashgan muhtasham “Karateren” majmuasi hech kimni befarq qoldirmadi.
Festival turli etnik guruhlardan bo‘lgan yoshlarni birlashtirgan holda xalqlarning madaniy xilma-xilligi va birligiga urgʻu berdi. Bu mintaqamizda xalqlarimizning turli madaniy an’analarini saqlab qolish muhimligini anglab, ajoyib va ahamiyatli voqealarni yaratishga qodir bo‘lgan kuchli va iqtidorli yoshlar borligining eng zoʻr isboti boʻldi.