"QARATEREŃ" ETNO-TURISTLIK KOMPLEKSI
2024-jıl 16-oktyabr kúni Qaraqalpaqstan Respublikası Taxtakópir rayonı Dawqara awılıındaǵı gózzal Bórshitaw aymaǵında jaylasqan jańa "Qaratereń" etno-turizm kompleksiniń saltanatlı ashılıw máresimi bolıp ótti.
"Qaratereń" turistlik kompleksiniń miymanları ushın ótawlar qalashası hám kemping úyleri, amfiteatr, balalar maydanshası shólkemlestirilgen.
272 Temir-beton teksheler Bórshitaw tóbesiniń janbawırınan baqlaw maydanına alıp baradı, ol jerden átiraptaǵı landshafttıń ájayıp kórinisi ashıladı.
Turistlik kompleks miymanlardı jergilikli mádeniyat ortalıǵına kiriw, onıń ózine tán qásiyetleri hám dástúrlerin úyreniw, muzıka hám ayaq oyınlardan zawıqlanıw, milliy taǵamlar hám ishimliklerdi tatıp kóriw, usı ájayıp aymaqtıń jergilikli miyrasın jaqsıraq túsiniwge járdem beretuǵın hár qıylı ilajlarda qatnasıwǵa mirát etedi.
Bul aymaq tábiyat penen tolıq birlesiw hám onıń biytákirar gózzallıǵınan zawıqlanıwǵa umtılıwshı ekoturizm ıqlasbentleri ushın oǵada qolaylı. Bul jerde gózzal tóbelikler menen oralǵan Qaratereń kóliniń ájayıp kórinisi ashıladı. Taza hawa, pútkilley tınıshlıq tınıshlıq hám tatıwlıq sezimin beredi, qala turmısınıń qıyınshılıqlarınan azat etedi.
"Bir bolsaq - bir xalqımız, birlessek - Watanbız!" súreni astında ótkerilgen eki kúnlik ilajda keń jámiyetshilik hám ǵalaba xabar qurallarınıń wákilleri, mádeniyat hám kórkem óner ǵayratkerleri jáne de sırt elli miymanlar qatnastı. Saltanattıń tiykarǵı qaharmanları Ózbekstannıń túrli aymaqlarınan kelgen jaslar boldı.
"Qaratereń" turistlik kompleksi xalıqlar arasındaǵı doslıq hám milliy birlik belgisi bolıp esaplanadı. Ózbekstan topıragında ózbekler, qaraqalpaqlar, qazaqlar, túrkmenler, tájikler, ruslar, tatarlar, koreysler hám basqa millet wákilleri tınısh aspan astında bir shańaraq bolıp jasap kelmekte.
Turistlik komplekstiń ashılıw máresimi sheńberinde otawlardiń janında jaslar festivalı bolıp ótti. Festivaldıń bayram baǵdarlamasında túrli xalıqlardıń milliy úrp-ádet hám dástúrlerin sáwlelendiretuǵın teatrlastırılǵan kompoziciyalar, milliy kiyimler kórgizbesi, awıl xojalıǵı ónimleriniń yarmarkası bolıp otti.
"Qaratereń" turistlik zonası átirapındaǵı plenerde xudojnikler jergilikli kórinislerdiń ájayıp etyudların jarattı.
Olardıń súwretleri ashıq reńlerge bay bolıp, bul jer tábiyatınıń ózine tán ózgesheliklerin sáwlelendirgen.
Pikirler hám tájiriybe almasıw plener baǵdarlamasınıń áhmiyetli bólegi bolıp, barlıq qatnasıwshılar ózleriniń dóretiwshilik izlenisleri menen ortaqlastı.
Amfiteatrda "Fashion night" atlı túrli millet wákilleriniń kiyimleriniń prezentaciyası hám qızıqlı koncert baǵdarlaması qoyıp berildi.
Saxnada xalıq namalarınan baslap zamanagóy xitlerge shekemgi hár qıylı usıldaǵı muzıkalıq kompoziciyalar jańladı. Festival qatnasıwshıları óziniń gózzal vokal shıǵıwları, kúshli ayaq oyınları hám jarqın xoreografiyalıq saxna kórinisleri menen tamashagóylerdi tań qaldırdı. Keshki koncert baǵdarlaması tásirlerge bay bulshıqlaw menen juwmaqlandı.
Názik tábiyat kórinisi arasında jaylasqan sawlatlı "Qaratereń" kompleksi hesh kimdi biypárwa qaldırmadı.
Festival túrli etnikalıq toparlardan bolǵan jaslardı birlestirgen halda xalıqlardıń mádeniy túrlılıǵı hám birligine itibar qarattı. Bul aymagımızda xalıqlarımızdıń hár qıylı mádeniy dástúrlerin saqlap qalıw áhmiyetliligin ańlap, ájayıp hám qızıqlı waqıyalardı jaratıwǵa uqıplı bolǵan kúshli hám qábiletli jaslardıń bar ekeniniń eń úlken dálili boldı.