Sultan Wáyis tawındaǵı Gáwir qala (b.e.sh. IV á. – b.e. III á.) Ámiwdáryanıń oń jaǵasında, Shılpıq hám Jampıq qala estelikleriniń ortalarında jaylasqan. Bul qorǵan erte Antik dáwirlerde salınǵan bolıp, onıń arqa táreptegi diywalı hám batıstaǵı diywalınıń bir bólegi saqlanıp qalǵan. Qorǵan trapetsiya formasında bolıp, Xorezm arxitekturasına tán bolǵan eki qatarlı diywalları hám oqjay atıwshılar ushın eki yaruslı galereyası, qarawıl tóbeler hám oq atıw ushın arnawlı orınlarǵa iye bolǵan. Diywallardıń sırtqı kórinisi olardı jawlap alıw qanshelli qıyın bolǵanlıǵınan dárek beredi.
Qorǵanda monumental imarat saqlanıp qalǵan bolıp, onda óreleriniń tırnaǵı bezelgen onsha úlken bolmaǵan zallar, diywalları súwret penen áshekóylengen teksheler (nishalar), sonday-aq altar tabılǵan. Itimal boyınsha, bul jerde kultlıq ot ibadatxanası bolǵan. Ilimpazlardıń pikirine qaraǵanda, «gáwir» sózi «otqa tabınıwshı» degendi ańlatadı. Gáwir qala b.e. III ásirge shekem paydalanılǵan.