Sultan Wáyis baba kompleksi (XVII–XIX áá.) Ámiwdáryanıń tómengi jaǵalawlarında oǵada qádirlenetuǵın orınlardıń biri bolıp tabıladı. Esteliktiń ataması Wáyis ál-Karaniydiń atı menen baylanıstırıladı. Ráwiyatlarǵa qaraǵanda, ol (Sultan Wáyis) payǵambardıń jolın dawamlawshılardıń biri bolıp, Yemendegi Karayin awılında jasaǵan.
Ilimpazlardıń tastıyıqlawı boyınsha, Sultan Wáyis baba kompleksi Sultan Muhammed Xorezmshax tárepinen salınǵan, biraq ta monǵol shabıwılı waqtında qıyratılǵan. XIX ásirdiń basında Xiywa xanı Eltezer bul jerde jańa imarat tikleydi. Mavzoleydiń sońǵı qurılısı Xiywa xanı Allaqulıǵa (XIX á.) tiyisli, degen pikirler bildirilmekte.
Bul qurılıs házirgi kúni bir qansha rawajlanǵan infrakstrukturasına iye birpútin kompleks retinde kózge túsedi, yaǵnıy bul jerde meshit, xızmet kórsetiw kompleksi, «muqaddes háwiz», sawda orayları, awqatlanıw punktleri, miymanxana hám t.b. orin alǵan.