Bazar qala (b.e.sh. VI –V áá. – b.e. I á.) arxaikalıq dáwirde júzege kelgen hám tap Qushan dáwirine shekem ómir súrgen. Áyyemde bul qala Bazar qala kanalınıń suwları menen suwǵarılatuǵın úlken awılxojalıq aymaǵınıń orayı bolǵan.
Qalanıń arqa-shıǵıs múyeshindegi kvadrat formasındaǵı qorǵan aytarlıqtay jaqsı saqlanıp qalǵan. Ol yarım oval formasındaǵı qarawıl tóbeleri bar eki qatar diywal menen qorshalǵan. Qalanıń múyeshlerindegi bir-birden salınǵan qarawıl tóbeler hám qorǵannıń ózinen parıqlı ráwishte, onıń arqa-batıs múyeshi pishimi boyınsha qarlıǵash quyrıǵınıń figurasın jasawshı eki qarawıl tóbe arqalı qorǵalǵan.
Qalada buzılǵan gúlal pechleri, toplanıp qalǵan metall shlakları hám quyma temir bólekleri qaldıqları (temir kritsalar) túrindegi xalıqtıń óndirislik iskerliginiń izleri tawılǵan.