Ańqa qala (I–III áá., X–XII áá.) Tórtkúl qalasınan arqaǵa qaray 22 km qashıqlıqta jaylasqan.
Derlik kvadrat formasındaǵı qorǵan jaqsı saqlanǵan. Bul jerde elege shekem sırtqı hám ishki diywal arasındaǵı dálizdi, tuwrımúyeshli qarawıl tóbelerdi, sırtqı diywal arasındaǵı atqıshlar oq atıwı ushın arnawlı orınlardı, bir qatarǵa dizilgen qarawıl tóbelerdi kóriwge boladı. Atap ótiw kerek, oq atıw ushın arnawlı orınlardıń dógeregin qaplap turǵan derlik barlıq gerbishlerge ustanıń belgisi – tamǵa basılǵan. Gerbishlerdiń birewinde bolsa bir qatarda bes tańbadan ibarat Áyyemgi Xorezm jazıwı saqlanıp qalǵan.
Ilimpazlardıń pikiri boyınsha, estelik b.e. I–III áá. sońǵı Antik Xorezm mádeniyatına tiyisli, qorǵanda tabılǵan keramika da áyne usı ásirlerge jatadı, dep belgilengen. Degen menen, jaqsı saqlanıp qalǵan bul bekinisler Orta ásirlerde de (X–XII áá.) paydalanılǵan bolıwı itimal.