Ózbekstanda ishki aviaqatnawlardıń keńeytiliwi turizm ushın jańa imkaniyatlar jaratadı.
Mámleket ishindegi transport qolaylıǵın arttırıw maqsetinde Ózbekstanda iyun ayınıń aqırınan baslap ishki turaqlı aviaqatnawlar sanı kóbeyedi.Bul bolsa mámleketimiz basshısınıń ishki turizmdi rawajlandırıw boyınsha tapsırmasın ámelge asırıwǵa xızmet etedi. Jańa jónelisler tiykarǵı tariyxıy hám turistlik oraylar arasındaǵı sapar waqtın qısqartıw, sonday-aq, aymaqlardıń óz-ara baylanıslılıǵın jaqsılaw imkaniyatın beredi. Atap aytqanda, "Centrum Air" aviakompaniyası 24-iyunnan baslap Samarqand - Úrgensh jónelisi boyınsha háptesine úsh márte párwazlardı jolǵa qoyadı. 25-iyunnan baslap bolsa Buxara - Úrgensh, Samarqand - Buxara hám Buxara - Tashkent jónelislerinde háptesine eki márte párwazlar ámelge asırıladı. Tashkent - Úrgensh jónelisi boyınsha bolsa álleqashan hár kúni (siyshembiden tısqarı) párwazlar ámelge asırılmaqta. Ishki aviaqatnawlardıń keńeyiwi turistler ushın jáne de qolaylı sharayatlar jaratıp, áhmiyetli tariyxıy hám mádeniy oraylarǵabarıwdı ańsatlastıradı. Transport infrastrukturasınıń jetilistiriliwi ishki turizmdi rawajlandırıw, aymaqlar ekonomikasın xoshametlew hám olardıń ulıwma milliy turistlik aǵımǵa qosılıwına járdem beredi.