11-13-mart kúnleri Rossiya paytaxtındaǵı "Krokus Ekspo" xalıqaralıq kórgizbeler orayında "MITT-2026" 32-xalıqaralıq turizm hám miymandoslıq kórgizbesi bolıp ótti. Turizm hám miymandoslıq sanaatı tarawındaǵı biznes máselelerin sheshiw ushın bul professional platforma hár jılı turizm biznesi hám miymandoslıq sanaatı ekspertleriniń eń iri b2b jámiyetshiligin toplaydı.
Abıraylı xalıqaralıq kórgizbede Oman, Túrkiya, Venesuela, Kuba, Iordaniya, Aljir, Malayziya, Qıtay, Armeniya, Tunis, Ázerbayjannan 3 mıń 807 delegat, turizm, gastronomiya, logistika, turistlik texnologiyalar tarawlarına qánigelesken iri kompaniya hám firmalar, xalıqaralıq ekspertler qatnastı.
Ilajda Ózbekstan delegaciyası, sonıń ishinde, Qaraqalpaqstan Respublikası delegaciyası da qatnastı. Turizm komiteti hám mámleketimizdiń Moskvadaǵı elshixanasınıń járdeminde shólkemlestirilgen Ózbekstan milliy stendinde turistlik kompaniyalar hám firmalar mámleketimizdiń turizm tarawındaǵı imkaniyatların kórsetti. Búgingi kúnde Ózbekstan dástúriy mádeniy-aǵartıwshılıq turizmnen tısqarı kóp tarmaqlı turizm ekonomikasın qáliplestirmekte. Jedel rawajlanıp atırǵan baǵdarlar arasında gastronomiyalıq, ilajlar, medicinalıq hám salamatlandırıw turizmi, sonday-aq, ekologiyalıq baǵdarlar hám zamanagóy qala turizmin ajıratıp kórsetiw múmkin.
Hár jılı Moskvadaǵı Xalıqaralıq turizm kórgizbesine bilimlendiriw seminarları, forumlar hám tematikalıq konferenciyalardı óz ishine alǵan bay isbilermenlik baǵdarlaması birge alıp barıladı. 11-mart kúni Ózbekstan delegaciyası turizm tarawında Rossiya-Ózbekstan baylanısların bekkemlewge baǵıshlanǵan "Rossiya - Ózbekstan: turizm birge islesiwiniń jańa gorizontları" strategiyalıq sessiyasında qatnastı. Bul áhmiyetli ilajda Ózbekstan Respublikası Turizm komiteti baslıǵınıń orınbasarı S.Tadjiev shıǵıp sóylep, mámleketimizdiń turizm tarawın transformaciyalaw strategiyası hám eki tárepleme birge islesiwdiń jańa formatları menen tanıstırdı.
Turizm basqarmasınıń baslıǵı B.Kusekeev basshılıǵındaǵı Qaraqalpaqstan delegaciyası Ózbekstannıń turizm tarawı hám Qaraqalpaqstan Respublikasınıń rawajlanıwına úles qosatuǵın dinamikalıq ekosistemanıń bir bólegine aylandı.
"MITT-2026" qatnasıwshıları óz jetiskenlikleri hám imkaniyatların kórsetip, tájiriybe almasıw ortalıǵın jarattı. Dodalawlarda jetekshi qánigeler, turistlik kompaniyalar hám mámleketlik strukturalardıń wákilleri, turagentler, turoperatorlar, otelerler, glemperler, turizm tarawı ushın IT-sheshimlerdi islep shıǵıwshılar, sonday-aq, turizm hám miymandoslıq sanaatınıń basqa da tiykarǵı qatnasıwshıları belsene qatnastı.
Kórgizbede qatnasıp atırǵan Qaraqalpaqstan turistlik kompaniyalarınıń wákilleri xalıqaralıq birge islesiwdi jáne de keńeytiw hám turistler aǵımın kóbeytiw maqsetinde sırt elli birge islesiwshiler menen B2B formatında nátiyjeli sóylesiwler alıp bardı.
Qatnasıwshılar ózleriniń isbilermenlik baylanısların keńeytiw, bahalı tájiriybe almasıw hám birge islesiw ushın jańa imkaniyatlardı tabıwǵa eristi. Bul, álbette, aymaqta turizmniń keleshegine, onıń turaqlı rawajlanıwı hám ósiwine unamlı tásir kórsetedi.
"MITT-2026" xalıqaralıq turizm hám miymandoslıq kórgizbesi turizm tarawındaǵı tendenciyalar haqqında áhmiyetli maǵlıwmatlarǵa iye bolıw ushın biybaha imkaniyat boldı. Ótkerilgen ushırasıwlar mámleketimizdiń xalıqaralıq turizm maydanındaǵı ornın jáne de bekkemlew, onı tartımlı hám básekige shıdamlı turistlik baǵdar sıpatında úgit-násiyatlawǵa xızmet etpekte.