Ózbekstan hám pútkil Oraylıq Aziya aymaǵı turizm industriyasınıń eń jarqın hám keń kólemli ilajı - "Jipek jolında turizm" Tashkent xalıqaralıq turizm yarmarkası 1995-jıldan berli ótkerilip kelinbekte. Bul jerde hár jılı dúnyanıń túrli múyeshlerinen turistlik biznes qánigeleri jıynaladı.
Ótken otız jıl dawamında TXTY atı menen belgili bolǵan Tashkent xalıqaralıq turizm yarmarkası dúnya turizm sanaatı wákilleriniń oraylıq ushırasıw ornı sıpatında ózin kórsetti. Ilaj hár jılı Birlesken Milletler Shólkeminiń Dúnya júzilik turizm shólkemi tárepinen rásmiy qollap-quwatlanıp, aymaqlıq hám xalıqaralıq turizmdi rawajlandırıwdıń áhmiyetli katalizatorı sıpatında tán alınadı. Búgingi kúnde yarmarkanıń tásiri Oraylıq Aziyadan biraz uzaqqa sozılıp, birge islesiw, bilim almasıw hám turistlik baǵdarlardı úgit-násiyatlaw ushın áhmiyetli platforma bolıp xızmet etpekte.
2025-jıldıń 27-29-noyabr kúnleri Tashkent qalasındaǵı "CaEx" (Central Asian Expo Uzbekistan) kórgizbeler orayında "Jipek jolında turizm" 30-xalıqaralıq turizm yarmarkasınıń saltanatlı ashılıw máresimi bolıp ótti. Yarmarka Ózbekstan Respublikası Turizm komiteti, "Milliy PR-markazi" MK, "Interforum" MUK tárepinen bas sherik sıpatında Uzbekistan Airways aviakompaniyası járdeminde shólkemlestirildi.
Yarmarka sheńberinde úsh kún dawamında 44 stend astında júzden aslam jergilikli hám sırt el turizm tarawınıń wákilleri óz jetiskenlikleri menen usınısların kórsetti. Turizm tarawındaǵı keń kólemli xalıqaralıq ilaj miymanlarına Ózbekstan aymaqlarınıń dıqqatqa ılayıq orınları hám jańa turistlik baǵdarlardıń prezentaciyaları kórsetildi.
Siyrek ushırasatuǵın turistlik baǵdarlar hám aymaqlıq dıqqatqa ılayıq orınlardıń prezentaciyası jergilikli hám sırt el kompaniyaları menen birge islesiwdi keńeytiw, turistlerdi tartıw ushın jańa perspektivalardı ashtı hám Ózbekstannıń xalıqaralıq maydandaǵı abırayın sezilerli dárejede arttırıwǵa xızmet etti.
Yarmarkaǵa 15 mıńnan aslam adam kelgen bolıp, olardıń arasında Rossiya, Belarus, Franciya, Germaniya, Ullı Britaniya, Niderlandiya, Gruziya, Ázerbayjan, Yaponiya hám Qıtay Xalıq Respublikası sıyaqlı 72 sırt mámleket wákilleri bar.
B2B ushırasıwları taraw qánigelerine jańa isbilermenlik baylanısların ornatıw hám birge islesiw perspektivaların dodalaw ushın teńsiz imkaniyat jarattı. "Hosted Buyers" professional qarıydarlar baǵdarlamasında 10 sırt el hám 30 dan aslam jergilikli turistlik kompaniyalar qatnastı. Yarmarka sheńberinde kóplegen sóylesiwler ótkerildi, olardıń juwmaqları boyınsha Ózbekstanda da, onnan tısqarıda da turizm tarawın bunnan bılay da rawajlandırıwǵa úles qosatuǵın shártnamalarǵa qol qoyıldı.
TXTY-2025 sheńberinde qatnasıwshılar turizm tarawındaǵı innovaciyalar hám zamanagóy tendenciyalar menen tanıstı. Yarmarka baǵdarlamasına temaǵa baylanıslı panel sessiyaları hám forumlar kirgizildi.
Aspazlıq mádeniyatı dúnyanıń 30 mámleketinen 200 den aslam aspazlar qatnasqan "Delicious Uzbekistan" ("D mazalı Ózbekstan") xalıqaralıq aspazlıq chempionatında kórsetildi.
Ónermentshilik ónimleri hám turistlik xızmetler kórgizbeleri baǵdarlamanı ráńbáreń hám jarqın etti.
"Jipek jolında turizm" 30-Tashkent xalıqaralıq turizm yarmarkası abıraylı "Silk Road Tourism Awards 2025" tańlawınıń jeńimpazların túrli nominaciyalar boyınsha saltanatlı sıylıqlaw máresimi menen juwmaqlandı. "2025-jıldıń eń úlgili jasıl turizm obekti" nominaciyasında Qaraqalpaqstan Respublikasınıń "Qaraqalpaq etnoawılı" turizm orayı jeńimpaz boldı. Ol turizmdi rawajlandırıwǵa ekologiyalıq jaqtan juwapkershilikli qatnastıń ayqın úlgisi bolıp, tábiyat hám mádeniy miyras arasındaǵı únleslikti kórsetti.
"Moynaq arzıwlar Aralı" shólkemi "Turizm logistikasında belsendi transport shólkemi" nominaciyası boyınsha sertifikatqa iye boldı, bul bolsa onıń aymaq turizm infrastrukturasın rawajlandırıwǵa qosqan salmaqlı úlesin atap ótedi.
Ózbekstan eń tez rawajlanıp atırǵan turistlik baǵdarlardan biri bolıp, 30-Tashkent xalıqaralıq turistlik yarmarkası mámlekettiń mádeniy baylıǵı, turaqlı rawajlanıwǵa qaratılǵan investiciyalar hám dúnya turistlik kartasındaǵı ósip baratırǵan rolin kórsetiw ushın ájayıp imkaniyat boldı. Ilaj Ózbekstandı perspektivalı turistlik baǵdar sıpatında úgit-násiyatlawǵa salmaqlı úles qosıp, jergilikli hám sırt el kompaniyaları arasında jańa birge islesiw baylanısların ornatıw ushın áhmiyetli maydanǵa aylandı. Usınılǵan eksklyuziv turistlik baǵdarlar hám aymaqlardıń bay mádeniy miyrası birge islesiwdi rawajlandırıw hám turistler aǵımın kóbeytiw ushın jańa imkaniyatlar ashıp, mámlekettiń túrli múyeshlerine qızıǵıwshılıqtı kúsheytti.
