2025-jıl 20-27-avgust kúnleri Ózbekstanda ekologiyalıq, waqıya hám ekstremal turizmdi rawajlandırıwǵa baǵıshlanǵan áhmiyetli xalıqaralıq ilaj - "Aralǵa sayaxat" avtosayaxat ótkerilmekte. Bul ilaj Ekologiya ministrligi, Turizm komiteti, Ózbekstan Ekstremal hám taw turizmi federaciyası hám "SamAvto," "Tegeta Motors" hám basqa da bir qatar shólkemler menen birgelikte shólkemlestirilgen. 
Joybardıń tiykarǵı maqseti Aralboyı aymaǵına ózbekstanlı hám sırt elli turistlerdiń itibarın tartıw, sonday-aq, jańa turistlik baǵdarlardı qáliplestiriw, keń jámiyetshilikti biybaha aymaqtıń ájayıp tábiyǵıy kórinisleri, tariyxıy estelikleri hám mádeniy qádiriyatları menen tanıstırıwdan ibarat.
Rossiya, Qazaqstan hám Tájikstan wákillerinen ibarat 80 nen aslam qatnasıwshılardan ibarat 30 ǵa shamalas joltańlamas Tashkentten umıtılmas sayaxatqa jol aldı. Jónelis oǵada perspektivalı hám qızıqlı boldı: ol áyyemgi Samarqand hám Buxara qalaları arqalı ótip, Aralboyınıń sırlı aymaǵı, tariyxıy Xiywa, Ózbekstannıń eń jas qalası - Nawayını qamtıp aldı hám juwmaǵında Ózbekstan paytaxtına qaytıw menen tamamlandı.
Tiykarǵı ilajlar Nókis qalasınıń turistlik dıqqatqa ılayıq orınların zıyaratlawdı óz ishine aldı. Savickiy muzeyindegi kvest-baǵdarlaması óz aldına ilaj sıpatında ótkerildi, onda qatnasıwshılar tariyx hám kórkem óner tarawındaǵı bilimlerin sınap kóriw imkaniyatına iye boldı.
Qalanıń aylanba jolı boylap ótkerilgen jarqın avtomobil paradı joybardıń barlıq qatnasıwshıları ushın tilekleslik belgisi bolıp, ilaj ortalıǵına kóterińkilik baǵıshladı.
Mádeniy baǵdarlama ájayıp muzeydi zıyarat etiw hám qaraqalpaq xalqınıń úrp-ádetleri menen tanısıw menen sheklenip qalmadı. "Aralǵa sayaxat" xalıqaralıq avtotur sheńberinde Nókis qalasındaǵı "Doslıq" kanalı jaǵalawında belgili "Kók shay" toparınıń koncert baǵdarlaması bolıp ótti. Topar óziniń ájayıp namaları menen tamashagóylerdi tań qaldırdı.
Bunnan soń joybar qatnasıwshıları Qaraqalpaqstannıń Moynaq rayonına jol aldı. Ol jerde Aral teńiziniń joǵalǵan ullılıǵınıń simvolına aylanǵan ápsanawıy "Keme qábirstanın" zıyarat etti.
Joybar qatnasıwshılarınıń kortejin kútip alıw ushın Aral teńizi jaǵasında shatır qalashası shólkemlestirildi. Ústirttiń gózzal kórinisleri, siyrek ushırasatuǵın teńiz suwlarında paddleboardlarda júziw hám tábiyat qoynında keshki awqat saltanatı biytákirar ortalıq jarattı.
Mazmunlı kúnniń juwmaǵında, juldızlar menen bezelgen aspan astında, kúshli DJ-set Aral teńizi jaǵasın muzıka hám quwanıshqa toltırdı!
Avtomobil jarısı qatnasıwshıları, sonday-aq, Qaraqalpaqstannıń ájayıp tábiyǵıy obekti - sulıw Ústirt platosında jaylasqan Barsakelmeske jol aldı. Bul jerde olar ájayıp landshaftlardı tamashalaw hám usı ájayıp jónelistiń ózine tán ortalıǵın seziw imkaniyatına iye boldı.
"Aralǵa sayaxat" joybarı avtoturizmniń jańa baǵdarların rawajlandırıwda áhmiyetli qádem bolıp, Aralboyı aymaǵın dúnya kartasında ekstremal turizmniń tiykarǵı orayına aylandırıw perspektivaların ashıp beredi.
Avtotur dawamında joybar qatnasıwshıları ǵalaba xabar quralları hám sociallıq tarmaqlar arqalı real waqıt rejiminde óz tásirleri hám usınısların keń jámiyetsilik penen bólisti. Bul avtosayaxat turizm arqalı xalıqaralıq birge islesiwdi bekkemlew hám Aralboyınıń dúnya jámietshiligindegi unamlı imidjin qáliplestiriwde áhmietli qádem bolıwı kútilmekte.