Ekstremal turizmdi ǵalaba en jaydırıw, sırt el turistleriniń sanın arttırıwdı xoshametlew hám ishki turizm potencialın rawajlandırıw maqsetinde 23-25-may kúnleri Qaraqalpaqstan Respublikasınıń Moynaq rayonında "Rally Muynak - 2025" keń kólemli Ózbekstan chempionatı bolıp ótti. Bul áhmiyetli baslama Turizm komiteti tárepinen "Vatanparvar" shólkemi, Qaraqalpaqstan Respublikası Joqarǵı Keńesi hám Ministrler Keńesiniń járdeminde ámelge asırıldı.
Úsh kún dawam etken jarqın hám qızǵın ilaj Ústirt platosı hám Aral teńizi ultanında bolıp ótti, bul bolsa qızıqlı jarıslar ushın ózine tán fon jarattı. Jarısta Ózbekstannan 120 dan aslam professional aydawshılar qatnastı. Olar 40 avtomobil, 25 motocikl hám 15 baggide óz sheberliklerin kórsetti.
Altınshı márte ótkerilip atırǵan "Rally Muynak-2025" ekstremal aydawshılıq jarısları aymaqtaǵı ekstremal avtosport tarawındaǵı eń áhmiyetli hám tamashagóy ilajlardan biri bolıp esaplanıp, pútkil dúnyadan tezlik, mártlik hám sheberlik ıqlasbentlerin ózine tartadı.
Ekstremal aydawshılıq boyınsha chempionattıń tiykarǵı maqseti - aymaqtıń turizm potencialın rawajlandırıw, jańa miymanlar aǵımın tartıw, turizmniń sport hám festival baǵdarların keńeytiw, sonday-aq, jas áwlad arasında avtosporttı ǵalaba en jaydırıwdan ibarat.
Sportshılar dvigatel kólemi 1600 sm3ge shekemgi bolǵan "A-8" kategoriyasındaǵı sport avtomobillerinde, 2000 sm3ge shekemgi bolǵan "A-9" kategoriyasındaǵı sport avtomobillerinde, 2000 sm3ge shekemgi dvigatelli baggi jarıslarında hám 125 sm3 hám 500 sm3 kólemli motocikllerde dinamikalıq jarıslarda óz sheberliklerin kórsetti. Klaslardıń bunday hár qıylılıǵı tezlik, adrenalin hám zawıq ortalıǵın jarattı.
Tańlawdıń mazmunlı baǵdarlamasın muzıkalıq jámáátlerdiń jarqın shıǵıwları tolıqtırdı, bul bolsa ilham hám kóterińki keypiyat ortalıǵın jarattı.
Abıraylı "Rally Muynak - 2025" chempionatınıń jeńimpazları Ózbekstan Respublikası Prezidentiniń bahalı sawǵaları - arnawlı sıylıqlar menen sıylıqlandı. Ózbekstan Respublikası Qorǵanıwǵa kómeklesiwshi "Vatanparvar" shólkemi Oraylıq keńesi, Turizm komiteti, Qaraqalpaqstan Respublikası Joqarǵı Keńesi hám Ministrler Keńesiniń basshıları atınan sportshılardıń trenerleri hám jarıs tóreshilerine estelik sawǵaları tapsırıldı. Bunday qollap-quwatlaw aymaqta avtosporttı jáne de rawajlandırıw, dástúrlerdi bekkemlew hám ekstremal sport túrlerin ǵalaba en jaydırıwǵa xızmet etedi.
Ilaj tek ǵana ekstremal sport túrleriniń sportshıları hám ıqlasbentlerin birlestirip qoymastan, al mámlekettiń jedel hám tartımlı turistlik baǵdar sıpatındaǵı imidjin qáliplestiriwge xızmet etetuǵın jarqın waqıyaǵa aylandı.