"Jipek jolında turizm" Tashkent xalıqaralıq turizm yarmarkası turizm tarawı qánigeleriniń global ushırasıw maydanı bolıp esaplanadı. 1995-jıldan berli Birlesken Milletler Shólkeminiń Pútkil jer júzilik turizm shólkemi (UNWTO)niń rásmiy járdeminde bul jerde onlaǵan mámleketlerdiń turizm imkaniyatları prezentaciyaları, júzlegen turizm tarawı qánigeleriniń isbilermenlik sóylesiwleri, xalıqaralıq turizmdi rawajlandırıwdıń áhmiyetli temalarına baǵıshlanǵan xalıqaralıq konferenciyalar ótkerilmekte. Sońǵı otız jıl dawamında Tashkent xalıqaralıq turizm yarmarkası pútkil dúnya júzi boylap turizm tarawı qánigeleri ushın Ózbekstan hám pútkil Oraylıq Aziya regionındaǵı eń áhmiyetli hám jarqın ilajlardan biri sıpatında ózin kórsetti.
Usı jıldıń 23-noyabr kúni Tashkent qalasında Ózbekstan Respublikası Ekologiya, qorshaǵan ortalıqtı qorǵaw hám ıqlım ózgeriwi ministrligi, Turizm komiteti, sonday-aq, "Milliy PR-orayı" MUK hám "Team & Co Group" kompaniyası menen birgelikte shólkemlestirilgen "Jipek jolında turizm" 29-xalıqaralıq turizm yarmarkası óz jumısın juwmaqladı.
Ilaj birinshi márte "CAEx" (Central Asian Expo Uzbekistan) xalıqaralıq kórgizbe orayında bolıp, onda pútkil dúnyadan turizm biznesi ekspertleri jıynaldı. Ilaj tarawdıń barlıq wákilleri: jetekshi turistlik hám transport kompaniyaları, iri miymanxana tarmaqları, diplomatiyalıq korpuslar, turizm tarawındaǵı bilimlendiriw mákemeleriniń xızmetkerleri ushın nátiyjeli boldı.
Xalıqaralıq yarmarkaǵa keliwshiler hám qatnasıwshılar Ózbekstannıń barlıq aymaqlarındaǵı jańa mánzillerdiń turizm potencialın bahalaw, mámleket xalıqlarınıń bay folklori, hár qıylı taǵamları hám dástúrleri menen tanısıw imkaniyatına iye boldı.
Ilajdıń tiykarǵı maqsetlerinen biri Ózbekstan turizm bazarın ashıq hám básekige shıdamlı ortalıq sıpatında kórsetiw edi.
Qaraqalpaqstan Respublikası Tashkent xalıqaralıq turizm yarmarkasında dáslepki minutlarınan-aq óziniń dizaynı menen miymanlardıń itibarın ózine tartqan stendin maqtanısh penen tanıstırdı.
Sahra kórinisi hám regionnıń zamanagóy kelbetin sheberlik penen birlestirgen ekspoziciyanıń oraylıq teması Aral teńiziniń sayızlanıwı nátiyjesinde júzege kelgen ayanıshlı ekologiyalıq apatshılıqtan keyin Qaraqalpaqstannıń jedel tikleniwin sáwlelendiredi. Qum, tumsıqlar, qayıq hám balıq awlaw úskeneleri miymanlardı region tariyxına alıp barıp, ótmish hám keleshekke úmit sabaqları bir-biri menen shırmasqan ózine tán ortalıq jaratadı. Shól kórinisi hám Aral teńizi kórinisiniń zamanagóy imkaniyatlar menen úylesiwi turistler ushın jańa sheklerdi ashadı. Shólkemlestiriwshilerdiń dóretiwshilik qatnası hám eń mayda detallarǵa shekem itibar stendti umıtılmas bolıwın támiyinledi.
Qaraqalpaqstan stendi "Eń kreativ stend" nominaciyasında jeńimpaz dep tabıldı, respublikamız wákilleri bolsa elektromobil menen sıylıqlandı. Bul jetiskenlik tek ǵana regionnıń bay mádeniyatı hám tábiyatına itibar berip qoymastan, Qaraqalpaqstanda turizmdi rawajlandırıw ushın jańa perspektivalardı ashıwǵa da xızmet etedi.
Yarmarkada Ózbekstan, Gruziya, Ázerbayjan, Rossiya, Qubla Koreya, Qazaqstan, Tailand, Chexiya, Indoneziya hám basqa da 19 mámleketten turistlik administraciyalar hám jeke menshik kompaniyalar qatnastı.
Onda 54 milliy stend kórsetilip, "Hosted Buyers" baǵdarlaması sheńberinde 30 dan aslam jergilikli hám 7 sırt el turistlik kompaniyaları mirát etildi.
Úsh kún dawamında yarmarkaǵa 20 mıńnan aslam adam kelip, mámlekettiń 14 regionınıń turizm imkaniyatları menen tanıstı.
Ilaj dawamında 20 000 nan aslam "B2B" formatındaǵı ushırasıwlar bolıp ótti, olarda turistlik shólkemler arasında 8 000 nan aslam shártnamalarǵa qol qoyıldı. Sonday-aq, keń kólemli ilaj 100 den aslam abıraylı ǵalaba xabar qurallarınıń itibarın tarttı hám bul Ózbekstannıń xalıqaralıq maydandaǵı abırayınıń sezilerli dárejede artıwına túrtki boldı.
Ilajdıń jabılıw máresiminde bir qatar nominaciyalar boyınsha sıylıqlar tapsırıldı, sonıń ishinde, Qaraqalpaqstan stendi "Eń kreativ stend" nominaciyasında jeńimpaz dep tabıldı, respublikamız wákilleri bolsa elektromobil menen sıylıqlandı.
Bul tabıs tek ǵana aymaqtıń mádeniyatı hám tábiyatı baylıǵın atap ótip qoymastan, al Qaraqalpaqstanda turizmdi rawajlandırıw ushın jańa perspektivalardı ashpaqta.
2024-jılǵı Tashkent xalıqaralıq turizm yarmarkası Ózbekstandı tartımlı turistlik baǵdar sıpatında úgit-násiyatlawda úlken áhmiyetke iye boldı. Bul ilaj jergilikli hám sırt el kompaniyaları arasında jańa isbilermenlik baylanısların ornatıw ushın ájayıp platforma boldı. Siyrek ushırasatuǵın turistlik baǵdarlar hám túrli regionallıq dıqqatqa ılayıq orınlardıń prezentaciyası mámlekettiń bay mádeniyatı hám tábiyǵıy gózzallıqlarına itibardı kúsheytti, birge islesiwdi keńeytiw hám turistler aǵımın keńeytiw ushın jańa imkaniyatlardı ashtı.
