Ózbekstan Respublikası Prezidentiniń "Shet el puqaralarına qosımsha qun salıǵın qaytarıw sistemasın jetilistiriw ilajları haqqında"ǵı qararı qabıl etildi.
Qararǵa bola 2026-jıl 1-aprelden baslap: respublikamızdıń barlıq xalıqaralıq aeroportlarında sırt el puqaralarına qosımsha qun salıǵın (QQS) qaytarıw sisteması jolǵa qoyıladı; sırt el puqaralarına olardıń ıqtıyarına tiykarlanıp QQStı naq pulda qaytarıp alıw imkaniyatı jaratıladı. Onda QQSnıń belgilengen stavkası muǵdarınıń 85 procenti sırt el puqarasına qosımsha qun salıǵı summasın qaytarıwǵa, 15 procenti "tax free" sisteması operatorınıń xızmetlerine qaratıladı; QQStı sırt el puqaralarınıń bank kartasına qaytarıw tovarlar alıp shıǵılǵan kúnnen keyin 3 jumıs kúninen kóp bolmaǵan múddette ámelge asırıladı; sırt el puqaralarına QQStı qaytarıwda minimal satıp alıw bahası qosımsha qun salıǵın esapqa alǵan halda 300 mıń sum etip belgilenedi; "tax free" sisteması engiziletuǵın tovarlardıń sheklengen dizimi (azıq-awqat ónimleri buǵan kirmeydi) biykar etiledi.
Qarardaǵı áhmietli ózgerisler: Endi QQStı qaytarıw sisteması tek ǵana aeroport hám vokzallarda emes, al shegara bajıxana postlarında da basqıshpa-basqısh engiziledi. Sonday-aq, sistemaǵa tek ǵana iri sawda orayları emes, al usaqlap satıw shaqapshaları da keńnen tartıladı.
Shet el puqaraları ushın satıp alınǵan tovarlar ushın QQStı qaytarıp alıw procesleri ápiwayılastırıladı. Esap-sanaqlardıń ashıq-aydınlıǵın támiyinlew maqsetinde sanlı texnologiyalar hám mobil qosımshalar imkaniyatlarınan keńnen paydalanıladı.
Byudjet hám korporativ buyırtpashılar tovar hám xızmetlerdi, sonıń ishinde, audit hám salıq másláhátiniń xızmetlerin birinshi gezekte jergilikli islep shıǵarıwshılardan satıp alıw imkaniyatların májbúriy tártipte úyrenedi. Bunıń ushın new.cooperation.uz portalı tiykarǵı platforma bolıp xızmet etedi.