Usı jıldıń 25-27-fevral kúnleri Hindstan paytaxtı Deli qalasında jaylasqan "Yashobhoomi Expo Center" kompleksinde bolıp ótip atırǵan Qubla Aziya mámleketleri turizm kórgizbesi - "SATTE-2026" (South Asiás Travel & Tourism Exchange) Ózbekstan milliy stendi menen qatnaspaqta.Maǵlıwmat ushın: 50 den aslam mámleketten 2 000 nan aslam stendti birlestirgen hám dúnya boylap 40 000 nan aslam qatnasıwshını tartqan bul kórgizbe sayaxat industriyasındaǵı eń iri ánjumanlardan biri sıpatında tán alınadı.
2023-jıldan berli hár jılı qatnasıp kiyatırǵan bul xalıqaralıq kórgizbe Turizm komiteti tárepinen shólkemlestirilgen milliy stendte Ózbekstannıń 10 turistlik kompaniyası hám "Uzbekistan Airways" AJ óz prezentaciyaların ótkermekte. Onda elimizdiń tartımlı turistlik baǵdarları, dıqqatqa ılayıq mádeniy orınları, jańa infrastruktura obektleri, sonday-aq, hindstanlı turistler ushın arnawlı usınıslar kórsetilmekte.Kórgizbe dawamında sırt elli qatnasıwshılar hám keliwshilerge Ózbekstannıń turizm potencialı, bay mádeniy hám tariyxıy miyrası haqqında tolıq maǵlıwmat berilmekte.
Mámleketimizdi tek ǵana Hindstanda emes, al Qubla-Shıǵıs Aziya mámleketlerinde de jedel úgit-násiyatlaw hám sırt el turistleriniń aǵımın kóbeytiw maqsetinde konferenciya hám seminarlarda qatnasıw, turistlik kompaniyalardıń wákilleri menen sóylesiwler ótkeriw hám B2B ushırasıwların shólkemlestiriw rejelestirilgen.
Sonıń menen birge, búgin ilajdıń birinshi kúninde delegaciya aǵzaları hám Hindstannıń bir qatar turistlik kompaniyaları, sonıń ishinde, "Air India (Airlines)," "NIMA Association" hám "UTEN Association" sıyaqlı iri shólkemlerdiń basshıları wákilleri menen ushırasıwlar shólkemlestirildi. Ushırasıwlar dawamında Ózbekstan hám Hindstan arasında turizm tarawındaǵı birge islesiwdi keńeytiw, tikkeley aviaqatnawlardı rawajlandırıw, birgeliktegi turistlik paketlerdi islep shıǵıw, sonday-aq, hind turistlerin Ózbekstanǵa tartıw boyınsha marketing hám úgit-násiyatlaw joybarların ámelge asırıw máseleleri dodalandı. Tárepler, sonday-aq, mámleketimizdiń tariyxıy qalalarınıń potencialın úgit-násiyatlaw hám iri xalıqaralıq hám máresim ilajların shólkemlestiriw perspektivaları boyınsha pikir alıstı.
Bul ilajda qatnasıw Hindstan hám Ózbekstan arasındaǵı turizm baylanısların jáne de bekkemlewge xızmet etedi.