2024-jıl 4-5-oktyabr kúnleri Ellikqala rayonında Tashkent mámleketlik ekonomika universiteti tárepinen Qaraqalpaqstan Respublikasında turizmdi rawajlandırıw maqsetinde shólkemlestirilgen "Sahra hawazı" II xalıqaralıq festivalı bolıp ótti.
"Sahra hawazı" festivalı Qaraqalpaqstan mádeniy miyrasın ǵalaba en jaydırıw, turistlerdi tartıw hám turizm tarawında xalıqaralıq birge islesiwdi bekkemlewge qaratılǵan. Ilaj baǵdarlamasınan miymanlardı Qubla Aralboyınıń ózine tán gózzallıǵı menen tanıstırıwǵa qaratılǵan mádeniy, kewil ashar hám aǵartıwshılıq processler orın alǵan.
Festivaldıń birinshi kúni baǵdarlamasında festival sheńberinde turizm tarawındaǵı tájiriybeli oqıtıwshı hám professorlardıń qatnasıwında xalıqaralıq trening ótkerildi. Oqıw ilajı turizm sanaatın rawajlandırıwdıń túrli jónelislerine baǵıshlanǵan bolıp, bul taraw qánigeleriniń kásiplik sheberligin arttırıw, qatnasıwshılardı turizmdi rawajlandırıwdıń sońǵı tendenciyaları menen tanıstırıw, tájiriybe almasıw hám Qaraqalpaqstanda turizmdi rawajlandırıwdı qollap-quwatlawǵa qaratılǵan.
Turistlik baǵdarlardı úgit-násiyatlaw, turistlik ónimlerdi basqarıw, aymaqlar marketingi hám brending boyınsha áhmiyetli máseleler kórip shıǵıldı. Trening qatnasıwshıları Ózbekstan hám basqa da mámleketlerdiń turizm tarawındaǵı jetekshi ekspertleri menen eń jaqsı tájiriybelerdi almasıw imkaniyatına iye boldı.
Xalıqaralıq trening Qaraqalpaqstannıń turizm potencialın bunnan bılay da rawajlandırıwǵa úles qosatuǵın pikirler almasıw hám birgeliktegi sheshimlerdi islep shıǵıw ushın nátiyjeli platformaǵa aylandı. Trening baǵdarlamasında turaqlı, ekologiyalıq hám juwapkershilikli turizmdi rawajlandırıw, sonday-aq, jergilikli jámiyetshilikti turizmge tartıwǵa ayrıqsha itibar qaratılǵan. Qatnasıwshılar Ellikqala rayonındaǵı túrli turistlik kórgizbe obektlerine barıw imkaniyatına iye boldı.
"Sahra hawazı" festivalı ráńbáreń hám qızıqlı baǵdarlamaǵa iye jarqın ilaj bolıp tabıladı. Topıraqqala qorganı aldındaǵı maydanda shólkemlestirilgen "Jańa Ózbekstan - biziń baxıtlı jaslarımız" temasındaǵı súwretlew óneri tańlawı dóretiwshi jaslardıń súwret salıw ónerindegi qábiletlerin kórsetiw imkaniyatın berdi.
Aqshakól jaǵasındaǵı dem alıw orayında "Milliy taǵamlar" tańlawı shólkemlestirilip, qatnasıwshılar gastronomiyalıq izleniwler arqalı Qaraqalpaqstannıń ózine tán mádeniyatına háwes etiw imkaniyatın berdı. Qatnasıwshılar tóreshilerge ózleriniń ájayıp milliy taǵamların usınıp, olardıń biytákirar dámin kórsetti.
Festivaldıń birinshi kúni keshki baǵdarlaması Aqshakól jaǵasındaǵı amfiteatrda jarqın koncert baǵdarlaması menen juwmaqlandı. Milliy folklor jámáátleri, belgili kórkem óner sheberleri, sazende hám ayaq oyınshılar bayram ortalıǵın jaratıp, festival qatnasıwshıları hám miymanlarına umıtılmas tásirler inam etti.
Dástúriy hám zamanagóy elementlerdi ózinde jámlegen ráńbáreń kewilashar baǵdarlama "Sahra hawazı" festivalın este qalatuǵın waqıyaǵa aylandırdı. Festival baǵdarlamasına bunday ilajlar onıń mádeniy quramın sezilerli dárejede kúsheytti hám aymaqımız haqqında tereńirek túsinikke iye bolıw imkaniyatın berdi.
Ishqıbaz dem alıw ıqlasbentleri ushın festivaldıń ekinshi kúni baǵdarlamasında Ayazqala esteligi aldındaǵı maydanda sport oyınları shólkemlestirildi. Bul baǵdarlama sheńberinde arqan tartıw, gúres, shaxmat oyınları boyınsha jarıslar ótkerilip, qatnasıwshılar óz kúshin, sheberligin hám aqıl-zákáwatın kórsetti.
"Sahra hawazı" II xalıqaralıq festivalınıń mazmunlı baǵdarlaması festival tańlawlarında ózin kórsetken jeńimpazlardı sıylıqlaw máresimi menen juwmaqlandı.
Sıylıqlaw máresiminde xalıq qosıqları hám ayaq oyınlarınıń eń jaqsı atqarılıwı, bezek hám lipaslardaǵı ózine tán qásiyet, qábilet hám dóretiwshilikke jantasıwda arnawlı sıylıqlar járiyalandı. Festival qatnasıwshıları tamashagóyler hám ilaj shólkemlestiriwshileri tárepinen múnásip álgısqa sazawar boldı hám qollap-quwatlandı.
Qaraqalpaqstan Respublikasında "Sahra hawazı" II xalıqaralıq festivalınıń shólkemlestiriliwi Ózbekstannıń ishki hám sırtqı turizmin rawajlandırıw, jáne de dúnyanıń basqa mámleketleri menen mádeniy baylanısların bekkemlewge xızmet etpekte. Turizm tarawına baǵdarlanǵan trening qatnasıwshılarǵa tájiriybeli ustaz hám professor-oqıtıwshılardan usı tarawdıń turli jónelislerin úyreniwde biybaha imkaniyat jarattı.
Súwret salıw tańlawı studentlerge ózleriniń dóretiwshilik potencialın kórsetiw imkaniyatın berdi. Konsert baǵdarlaması, sózsiz, ilaj qatnasıwshıları hám tamashagóylerge bayram keypiyatın baǵıshladı.
"Milliy taǵamlar" tańlawı aymaqtıń aspazlıq óneri menen tanısıw imkaniyatın berdi. Sport oyınları bolsa kúsh-quwat hám jarıs ruwxın kúsheytti. Festival miymanları Qaraqalpaqstannıń Ellikqala rayonında jaylasqan áyyemgi qalalardı zıyarat etiw arqalı wálayattıń mádeniyatı hám tariyxı menen jaqınnan tanısıw imkaniyatın berdı. Bul ámeliy tájiriybe ilaj qatnasıwshılarına aymaqtıń turizm potencialın tereńirek ańlaw imkaniyatın jarattı.
