29-31-may kúnleri Moynaqtaǵı ápsanaǵa aylanǵan kemeler "qábirstanı"nda Turizm komitetiniń járdeminde "Stihia" elektron muzıka, kórkem óner hám ilim festivalı bolıp ótti hám onda 5 mıńnan aslam miyman qatnastı. Ilajdan gózlengen tiykarǵı maqset wálayattıń mádeniy turmısın rawajlandırıw, sırt elli hám jergilikli turistlerdi tartıwdan ibarat boldı.
Bul jarqın waqıya dúnyanıń hár qıylı múyeshinen kelgen muzıkashılar, DJler, prodyuserler, sonday-aq, kórkem óner hám ilim ǵayratkerlerin birlestirip, Aralboyı aymaǵın kórkem óner, ilim hám insan ruwxıyatı kúshi arqalı qayta tiklew ushın birgelikte umtılıw platformasına aylandı. Shólkemlestiriwshiler tek ǵana muzıka mádeniyatın úgit-násiyatlawǵa emes, al jámiyettiń itibarın áhmiyetli ekologiyalıq máselelerge qaratıwǵa umtıldı.
"Stihia" - bul tek gana muzika emes. Bul jerde muzıka Moynaqtıń qollap-quwatlaw hám ǵamxorlıqqa mútáj áhmiyetli maqset ekenligin dúnyaǵa jetkeriwge járdem beretuǵın qural bolıp esaplanadı.
Insan ruwxınıń qúdireti hám ómir manifesti festivaldıń tiykarǵı temasına aylandı.
Moynaqtıń awır sharayatına shıdamlı ekologiyalıq taza materiallardan jaratılǵan barlıq installyaciyalar kórkem óner hám tábiyat arasındaǵı únleslikti atap ótip, keń kólemli waqıya tariyxına sińip ketti. Hár bir kórkem óner dóretpesi tek ǵana tań qalarlıq emes, al planetamızǵa abaylı múnásibette bolıw zárúrligin de eskertedi.
Festivaldıń tórt saxnasında dúnyanıń túrli múyeshinen kelgen elektron muzıka atqarıwshıları, avangard kompozitorlar, Ózbekstan hám Oraylıq Aziyanıń jarqın wákilleri jámlesti. Hár bir shıǵıw tamashagóylerdi elektron, progressiv hám etnik sesler umıtılmas ortalıqqa batırdı.
Festivaldıń ayaq oyın epicentri "I will see you again, jonim" saxnasında janlandı, bul jerde texno, elektro hám getto-saundtıń aldınǵı formaları mirát etilgen artistlerdiń ájayıp janlı shıǵıwları menen úylesken. Bul muzıkalı boyaw atmosferanı aqılǵa sıymaytuǵın energiya hám ritm menen toltırıp, júreklerdi bir qálipte soǵıwǵa májbúrleytuǵın edi.
"Aq keme" saxnası kemeni shawqımlı elektronikadan folklk hám avangard-popqa shekemgi spektakllerdi óz ishine alǵan janlı shıǵıwlar ótkeriletuǵın siyrek ushırasatuǵın koncert maydanına aylandırdı. Hár bir ses, hár bir nota ózine tán muzıkalıq tájiriybeler ortalıǵın jarattı.
"Lighthouse" bar formatındaǵı haqıyqıy muzıkalı oaziske aylandı, ol jerde quyash batıwı ital-disko hám melodik xaus astında kútip alındı. Bul jerde asıqpay ayaq oyını hám dauntempo astında otırıspalar tolıq sáykeslikti payda etetuǵın edi, al mayaktan kórinetuǵın ájayıp kórinis bul tartımlılıqqa ayrıqsha mánis berdi.
"Back To Muynak" saxnasında furadaǵı didjeyler festivaldıń eń keń kólemli ayaq oyın maydanshasın jarattı, onda texnodan tartıp xardkor hám dram-n-beyske shekemgi xitler jańladı.
Bul kúshli muzıkalıq aǵım ritm tolqınlarına beriliw hám ózin kórsetiw erkinliginen zawıqlanıwǵa tayar bolǵan ayaq oyınshılar hám qıyalparazlardı jámledi. Hár bir atqarıw jańalıq bolıp, muzıka hár qanday shegaranı jeńip óte alatuǵın universal til ekenligin tastıyıqladı.
Muzıkalıq baǵdarlamadan tısqarı, "Stihia" festivalı "Stihia N+1" forumında bilim hám ideyalar almasıw ushın ayrıqsha imkaniyat usındı. Bul jerde jergilikli xalıq óz aymaqları haqqındaǵı bilimleri menen ortaqlastı, mirát etilgen spikerler óz tájiriybeleri menen ortaqlastı, eko-brendler hám ónermentler yarmarkası bolsa, Qaraqalpaqstan kórkem óneri hám dástúrleri menen jaqınnan tanısıw imkaniyatın berdi.
Festival sheńberinde jetekshi IT-qánigeler, investorlar hám sanlı sanaat wákilleri jıynaldı. Bul áhmiyetli ilaj ideyalar almasıw hám texnologiyalardı rawajlandırıw perspektivaların dodalaw, aymaqtı úgit-násiyatlaw hám jaslar ushın imkaniyatlardı keńeytiwge úles qosıw ushın maydan boldı. Qarım-qatnas hám birge islesiwdiń ruwxlandırıwshı ortalıǵı sanlı transformaciyanı jedellestiriw hám Aralboyı aymaǵınıń turaqlı rawajlanıwın qollap-quwatlawǵa járdem beretuǵın innovaciyalıq ideyalardı jaratıw ushın tiykar boldı. Tek ǵana birgelikte áhmiyetli ekologiyalıq máseleler hám jaǵdaydı jaqsılawdıń múmkin bolǵan jolların dodalaw arqalı aymaqtı tiklewge úles qosıwımız múmkin.
Festivalda ámelge asırılǵan sociallıq baslamalar arasında "Stihia Gen" hám "Stihia Arts" joybarları ayrıqsha ajıralıp turdı. Bir neshe ushırasıwlar dawamında "Stihia Gen IT" baǵdarlamasınıń qatnasıwshıları bolǵan 35 oqıwshı neyron tarmaqlardan paydalanǵan halda súwret jaratıw ónerin úyrendi. Olardıń mashaqatlı miynetiniń nátiyjesi animaciyalıq film bolıp, ol "Stihia N+1" forumı sheńberindegi "Zamanagóy jasalma intellekt texnologiyaları hám olardı zamanagóy bilimlendiriwge engiziw" sessiyasında úlken qızıǵıwshılıq penen usınıldı.
"Stihia" festivalı óz miymanlarına hár qıylı kewil ashar ilajlardı usındı: sheberlik sabaqları, yoga shınıǵıwları hám qızıqlı oyınlar, hár bir adam óz qızıǵıwshılıǵı boyınsha shınıǵıw tabıwı hám talantın kórsetiwi múmkin bolǵan awızbirshilik hám belsendilik ortalıǵın jarattı. Kórkem-óner installyaciyaları, sózsiz, dóretiwshilik hám ózin-ózi kórsetiwge ilhamlandırdı, mákandı ózine tán energiya menen toltırǵan biybaha mádeniy tásirler palitrasın qáliplestirdi.
"Aq Keme" saxnasında moynaqlı jas talant iyeleri "Stihia Gen" joybarı sheńberinde belgili muzıkashılar menen birge baslawshı elektron muzıka atqarıwshıları sıpatında qatnastı.
Olardıń birgeliktegi dóretiwshilik jumısları nátiyjesinde tásirsheń "Teńiz qosıǵı" kompoziciyası jaratıldı. Shın júrekten sezimlerge tolı bul shıǵıp sóylew tıńlawshılardıń kewlinde óshpes iz qaldırdı.
Bir waqıtları mol suwlı Aral teńizi bolǵan, házirgi waqıtta kemeler "qábirstanı"na aylanǵan shólistanlıqtıń tartımlı kórinisi óziniń qayǵılılıǵı menen jańa qádiriyatlar jaratıwǵa iytermeleydi. Bul kórinis oyanıw biziń ishimizde baslanıp atırǵanın esletedi. Bul jerde, Moynaqtıń qushaǵında hár birimiz dúnyamızdı qayta tiklew hám kóklemzarlastırıw, onı haqıyqıy gózzallıqqa aylandırıwǵa úles qosıwǵa uqıplı ekenimizdi ańlaymız.
Dástúrge bola, 2025-jılǵı "Stihia" jetinshi xalıqaralıq elektron muzıka, ilim hám kórkem óner festivalın ótkeriw vertolyot maydanshasındaǵı tiykarǵı qurılmanı simvolikalıq jaqıw menen juwmaqlandı.
Bul tartımlı waqıya Nikinanıń shıǵıp sóylegen sózi astında, kóterilip atırǵan quyashtıń dáslepki nurları gorizonttı jaqtırtıp, bul demge ayrıqsha áhmiyet bergen - birlik hám jarqın keleshekke úmit momenti bolǵan waqıtta júz berdi.