Aralboyı Evraziyanıń orayında, burınǵı Aral teńizi átirapında jaylasqan siyrek ushırasatuǵın tábiyat aymaǵı bolıp esaplanadı. Sońǵı bir neshe on jıllıqlar dawamında bul úlke suw derekleriniń sayızlanıwı hám pataslanıwı nátiyjesinde júzege kelgen úlken ekologiyalıq hám sociallıq mashqalalarǵa dus keldi, bul bolsa aymaqtıń sırtında da ekologiya jaǵdayına hám insanlardıń turmıs tárizine sezilerli tásir kórsetti. Sonlıqtan Aralboyı aymaǵın rawajlandırıw tek ǵana jergilikli emes, al ulıwma jer júzilik wazıypaǵa aylanıp, kompleksli qatnas jasawdı, hár qıylı mámleketler hám shólkemlerdiń háreketlerin birlestiriwdi talap etpekte.
2025-jıl 17-19-aprel kúnleri Qaraqalpaqstan turizm orayına aylandı. Hár jılı ótkeriletuǵın Xalıqaralıq Aral turizmi hápteligi sheńberinde Respublikada jergilikli xalıq hám turistlerdiń itibarın tartqan jarqın hám áhmiyetli waqıyalar bolıp ótti.
Úsh kún dawam etken ilaj baǵdarlamasınan mazmunlı mádeniy-aǵartıwshılıq ilajlar orın alǵan. Miymanlar belgili I.V.Savickiy atındaǵı Mámleketlik kórkem óner muzeyinde bolıp, ol jerde kórkem óner dóretpeleriniń bay kollekciyasınan zawıqlandı.
Sonday-aq, qaraqalpaq mádeniyatı hám dástúrlerine tereń kirip barıwdı usınıs etken "Qaraqalpaq etno awılı" etnografiyalıq turizm orayına da úlken itibar qaratıldı. Qatnasıwshılar “Mizdaxqan” tariyxıy-mádeniy kompleksinde bolıp, aymaqtıń tariyxı hám mádeniyatı menen jaqınnan tanıstı. Bul tek ǵana Qaraqalpaqstan miyrası menen tanısıw emes, al usı ájayıp aymaqqa tán doslıq hám miymandoslıq ortalıǵınan zawıqlanıw ushın biybaha imkaniyat boldı.
Háptelik baǵdarlamasınan "Jasıl mákan" ulıwma milliy joybarı sheńberinde shólkemlestirilgen terek egiw akciyası, sonday-aq, "10 mıń qádem" jámiyetlik joybarınıń piyada marafonı sıyaqlı ilajlar da orın aldı. Bul baslamalar tek ǵana aymaqtı kóklemzarlastırıwǵa úles qosıp qoymastan, al ekologiya hám belsendi turmıs táriziniń áhmiyetine de itibar qarattı. Terek egiw akciyası jergilikli xalıqtıń ekologiyalıq jaǵdaydı jaqsılaw hám Qaraqalpaqstannıń tábiyǵıy ortalıǵın tiklewge bolǵan umtılısınıń belgisi boldı. Ilaj qatnasıwshıları tek ǵana aymaqqa kórk baǵıshlaw emes, al aymaqtaǵı hawanıń sapasın jaqsılawǵa da xızmet etetuǵın jasıl aymaqlardı jaratıwǵa óz úlesin qostı.
"10 mıń qádem" piyadalar marafonı turli jastaǵı insanlar ushın birlesiw hám salamat turmıs tárizin qollap-quwatlaw ushın úlken imkaniyat boldı. Bul joybar qatnasıwshılar arasında turaqlı fizikalıq belsendilik dástúrin qáliplestiriw hám sociallıq baylanıslardı bekkemlewge xızmet etetuǵın haqıyqıy bayramǵa aylandı.
Aralboyı turizm hápteliginiń ekinshi kúninde "Aralboyı jaqsı niyet elshileri" xalıqaralıq ilimiy-ámeliy konferenciyası óz jumısın basladı. Bul platforma 180 nen aslam qatnasıwshını - mámleketlik uyımlardıń wákilleri, tábiyattı qorǵaw institutları, bilimlendiriw mekemeleri, xalıqaralıq shólkemlerdiń qánigeleri, sırt elli ekspertler hám ǵalaba xabar quralların aymaqtı rawajlandırıwdıń áhmiyetli máselelerin dodalaw, óz-ara pikir alısıw hám tabıslı ámeliyatlardı dodalaw ushın birlestirdi. 
Konferenciyada Aralboyı ekosistemasın tiklew, Aral teńiziniń qurıǵan ultanında toǵayzarlıqlardı kóbeytiw, topıraqtıń shorlanıwın azaytıw, suwdan aqılǵa uǵras paydalanıw hám turaqlı turizmdi rawajlandırıw máselelerine ayrıqsha itibar qaratıldı.
Hár jılı ótkeriletuǵın "Aral teńizi balıqlarınan 99 túrli taǵam" gastronomiyalıq festivalında aspazshılıq dóretiwshiligi ortalıǵı húkim súrdi.
Aral turizmi hápteligi miymanları hám qatnasıwshıları Qaraqalpaqstannıń talantlı aspazları tárepinen jaratılǵan, dástúrler hám innovaciyalardı sheberlik penen úylestirgen aspazlıq taǵamların joqarı bahaladı.
Ashpazlar arasında ótkerilgen jarıs hám jeńimpazdı tańlaw ilajdıń jáne de kóterińkilik hám qızıǵıwshılıq penen ótkeriliwine xızmet etti. "Open-air"dıń keshki koncert baǵdarlaması bayramǵa umıtılmas kóterińki ruwx baǵıshladı.
Solay etip, Xalıqaralıq Aral teńizi hápteligi baǵdarlamasına kirgizilgen ilajlar Aralboyı aymaǵın hár tárepleme rawajlandırıw hám onıń mádeniy miyrasın qásterlep saqlawǵa qaratılǵan. Olar turistlik potencialdı úgit-násiyatlaw, ekologiyalıq jaǵdaydı turaqlastırıw hám xalıqaralıq imidjdi bekkemlewge xızmet etpekte. Qaraqalpaqstannıń bay mádeniyatı hám siyrek ushırasatuǵın tábiyǵıy resurslarına itibardı qaratıw turistler hám izertlewshiler ushın jańa sheklerdi ashadı, bul ájayıp úlkeni, onıń tariyxı hám dástúrlerin tereńirek túsiniw imkaniyatın beredi.
