Prezidentimizdiń baslaması menen dekabr ayınıń ekinshi ekshembisi Awıl xojalıǵı tarawı xızmetkerleri kúni sıpatında keńnen belgilenip kelinbekte. Usı jılı Qaraqalpaqstan Respublikası Nókis qalasınıń arqa tárepindegi At shabar maydanında bul ullı áyyyamǵa baǵıshlanǵan jarqın bayram ilajları bolıp ótti.
Ulıwmaxalıqlıq zúráát bayramı Qaraqalpaqstandaǵı eń jarqın hám keń kólemli bayram mádeniy-kewil ashar ilajlardan biri. Bul bayram xalqımızdıń mádeniyatı hám dástúrlerinde tereń tamır taslap, keń kólemde belgilenbekte. Ol kóp ásirlik dástúr hám úrp-ádetlerdi jas áwladqa jetkeriwde, ósip kiyatırǵan áwladqa awıl xalqınıń miynetin qádirlew hám awıl xojalıǵınıń mámleket ekonomikası hám mádeniyatı ushın áhmiyetin ańlawda járdemlesiwde ayrıqsha rol atqaradı.
Pútkil mámleket boylap bayram dawamında ǵalabalıq ilajlar ótkerilip, olarda qosıq hám ayaq oyınlar atqarıladı, tańlawlar hám sport oyınları ótkeriledi. Adamlar jerdiń ónimdarlıǵın belgilew, quwanısh baǵıshlaw hám tábiyattıń saqawatlı baylıqları ushın minnetdarshılıq bildiriwge jıynaladı.
Bayram baǵdarlamasında dástúriy milliy sport oyınları, sonıń ishinde, arqan tartısıw, palwanlar bellesiwleri, qoshqarlar dúgistiriw, sonday-aq, "Ilaq oyını," "Qız quwıw," "Teńge alıw" sıyaqlı milliy at oyınları ótkerildi.
Folklor namaları hám milliy ayaq oyınlar koncert baǵdarlaması sheńberinde bayram hám quwanısh ortalıǵın jarattı. Xalıq seyilleri bayramdı quwanısh hám shadlıqqa toltırdı.
Qaraqalpaqstanlı fermerler tárepinen jetistirilgen awıl xojalıǵı ónimleriniń kórgizbesi ilajdıń ózine tán bezegi bolıp, jergilikli diyqanshılıq dástúrleriniń baylıǵı hám ráńbáráńligin kórsetti.
Zúráát bayramı jıl juwmaqların, máwsim juwmaqlanǵanın ańlatadı hám jerdiń saqawatlılıǵına minnetdarshılıq máresimi sıpatında kórinedi. Bul waqıtqa kelip, barlıq atız jumısları juwmaqlanıp, kelesi jıl ushın shańaraq abadanlıǵınıń tiykarı qoyıladı. Bul tek ǵana molshılıqtı belgilew emes, al ótip atırǵan jıl, erisilgen jeńisler hám bastan ótkerilgen qıyınshılıqlar haqqında pikirlew waqtı da bolıp tabıladı. Bul bayram adamlarǵa tábiyatqa bolǵan múnásibetin qayta kórip shıǵıw imkaniyatın beredi hám jańa, zúráátli hám abadan turmıs tárizine tiykar jaratadı.
Hár jılı ótkeriletuǵın ilaj mámleketimiz awıl xojalıǵın rawajlandırıwǵa sheksiz úles qosıp atırǵan insanlardıń miynetin húrmetlew ushın ájayıp imkaniyatqa aylandı. Bul waqıtta adamlar miynet jılın juwmaqlaydı, tábiyattıń saqawatı ushın minnetdarshılıq bildiredi hám óz miynetleriniń nátiyjesinen quwanadı.
Zúráát bayramı turistler ushın aymaqtıń mádeniyatı hám dástúrleri menen tanısıw, awıl xojalıǵı menen baylanıslı jergilikli úrp-ádetlerdi úyreniw ushın biybaha imkaniyat bolıp esaplanadı. Bul bayramda qatnasıw haqıyqıy folklor shıǵıwların, milliy ayaq oyınların kóriw hám janlı muzıkanı tıńlaw imkaniyatın beredi. Ilajlardıń keń kólemliligi sayaxatqa qızıǵıwshılıq hám quwanısh baǵıshlaydı, onı jarqın estelikler menen bayıtadı. Ulıwma alǵanda, zúráát bayramı turistlerge jergilikli mádeniyattı tereńirek ańlaw, tábiyat hám jámiyet penen únleslikti seziniw imkaniyatın beretuǵın umıtılmas waqıya bolıp esaplanadı.