I.V.Savickiy atındaǵı Qaraqalpaqstan Respublikası mámleketlik kórkem óner muzeyi Ózbekstandaǵı eń iri muzeylerden biri. Muzey kollekciyası rus avangardı dóretpeleri kollekciyaları arasında áhmiyeti hám kólemi boyınsha dúnyada ekinshi, sonday-aq, Aziyadaǵı eń jaqsı kórkem kollekciya sıpatında tán alınǵan.
Muzey 1966-jılı ájayıp ilimpaz, etnograf hám xudojnik Igor Vitalevich Savickiy tárepinen shólkemlestirilgen. Muzeydiń jaratılıwı hám rawajlanıw tariyxı onıń kollekciyası sıyaqlı ózine tán. 
I.V.Savickiy atındaǵı Qaraqalpaqstan Respublikası mámleketlik kórkem óner muzeyi kollekciyası misli kórilmegen qısqa múddette jıynaldı. Barı-joǵı bir neshe jıl ishinde Savickiy muzeyde rus hám Túrkstan avangardınıń súwretlew óneriniń eń tolıq toplamlarınan birin, Qaraqalpaqstan dekorativ-ámeliy kórkem óneriniń eń áhmiyetli toplamlarınan birin hám Áyyemgi Xorezm arxeologiyalıq eksponatlarınıń biybaha toplamın toplawǵa eristi. Bunday fakt jáhán muzey toplaw ámeliyatında uqsası joq. 1984-jılı I.V.Savickiy qaytıs bolǵannan soń muzeyge onıń atı berildi.
1991-jildan baslap muzeyge birinshi xalıqaralıq kategoriya berildi, bul bolsa muzeydi Tretyakov galereyası, Rus muzeyi hám Ermitaj benen bir qatarga qoyadı.
Igor Savickiy atındaǵı Qaraqalpaqstan Respublikası mámleketlik kórkem óner muzeyiniń zamanagóy kollekciyasında 100 mıńnan aslam kórkem óner dóretpeleri bar. Bul biziń eramızǵa shekemgi III ásirden baslap (áyyemgi hám orta ásirler Xorezm materiallıq hám kórkem mádeniyatı buyımları - Topıraqqala, Toqqal'a, Mizdaxqan hám basqa da arxeologiyalıq tabılmalar) mádeniy bólek haqqında túsinik beretuǵın ǵáziyne bolıp tabıladı. Zardushtiylik terrakota háykelleri Anaxitalar - ónimdarlıq qudayları, ossuariyler – otqa sıyınıwshılardın ólgen ata-babaları qaldıqların jerlew ushın ıdıslar.
Sonǵı antik I-IV ásirlerge almanı uslap turgan qol tárizli bronza ilgeshek, bronzadan jasalǵan shıraqlar hám XII-XIII ásirlerge tiyisli dán, gúze hám basqa zatlardı saqlaw ushın gúlalshılıq toplamı - xumlar kiredi.
Qaraqalpaqstan ámeliy bezew óneri buyımlarınıń kópshiligi XIX ásirdiń ekinshi yarımı - XX ásir baslarına tuwra keledi. Olardıń arasında kóshpeli xalıqlar atlanıslarında paydalanǵan aǵash hám teriden islengen buyımlar - gúmis penen bezelgen at erleri, ıdıs-tabaqlar ushın qaplar, otaw ushın oyma esikler bar.
Qaraqalpaq qara úylerin bezew ushın gilem ónimleri - naǵıslı sızıqlar ayrıqsha qızıǵıwshılıq oyatadı, olardı jaratıwda bórtpe túkli toqıwdıń ayrıqsha texnikası qollanılǵan, serdolik hám feruza qosımtası menen gúmisten islengen áyyemgi qaraqalpaq zergerlik buyımlarınıń bay toplamı bar. Atı belgisiz xalıq ustalarınıń qolları menen jipekten milliy kiyimler tigilgen.
XX ásirdiń 20-40-jıllarında rus avangard reńli súwretleri kollekciyası Nókis muzeyine pútkil dúnyaga dańqın tarattı. Muzey zallarında shıǵarmaları kórsetilgen kóplegen avtorlar (Robert Falk, Kliment Redko, Lyubov Popova, músinshi Vera Muxina) Evropada jaqsı tanılǵan. Muzey ekspoziciyasında xudojnik A.Volkov hám názik talǵamlı stilist Usto Mumin (A.Nikolaev), Ózbekstanda jasap ótken belgili impressionist xudojniklerdiń shın mánisindegi dúrdana shıǵarmaları, U.Tansıqbaev hám N.Qaraxannıń dáslepki shıǵarmaları kórsetilgen. V.Rojdestvenskiy, Ye.Korovay, M.Kurzin, A.Shevchenkolardın avangardqa ruwxıy hám stillik jaqın ájayıp polotnoları. Muzey tamashagóylerin Qaraqalpaqstannıń zamanagóy xudojnikleri, sonıń ishinde, J.Izentaev, B.Serekeev, R.Matevosyan, J.Quttimuratovtıń shıǵarmaları menen tanıstıradı.
2024-jıl 4-oktyabr kúni I.V.Savickiy atındaǵı Qaraqalpaqstan mámleketlik kórkem óner muzeyinde burın Italiyada kórsetilgen "Ózbekstan: shóldegi avangard" keń kólemli kórgizbe joybarınıń prezentaciyası bolıp ótti. Kórgizbede XX ásirdiń birinshi yarımına tiyisli 150 den aslam reńli súwret hám grafika shıǵarmaları, sonday-aq, XIX ásirdiń aqırınan XX ásirdiń 50-jıllarına shekemgi dáwirdi qamtıp alǵan ámeliy kórkem óner buyımları kórsetildi.
Barlıq eksponatlar mámlekettiń eki jetekshi mámleketlik muzeyi: I.V.Savickiy atındaǵı Nókis kórkem óner muzeyi hám Tashkent qalasındaǵı kórkem óner muzeyi toplamlarınan usınılǵan.
Bul siyrek ushırasatuǵın ilaj tamashagóylerdi rus hám Túrkstan avangardı dúnyasına qızıqlı sayaxatqa shaqıradı. Kórgizbe eksponatları arasında XX ásirdiń birinshi yarımında Oraylıq Aziyanıń tiykarǵı kórkem baǵdarların qáliplestirgen belgili xudojniklerdiń dúrdana shıǵarmaları da bar.
2025-jıl 6-aprel kúni Aral mádeniyatı sammiti sheńberinde Igor Savickiy atındaǵı Qaraqalpaqstan Respublikası mámleketlik kórkem óner muzeyi 2-ekspoziciya blogınıń 3-qabatınıń jańalanǵan ekspoziciyası saltanatlı túrde ashıldı. "Igor Savickiy dúnyası" joybarı muzey ekspoziciyasın qayta kórip shıǵıwda áhmiyetli basqısh esaplanadı. Jańalanǵan mákan súwretlew, arxeologiya hám ámeliy kórkem ónerdi birlestirip, Savickiydiń Aralboyı mádeniy miyrasın qásterlep saqlawǵa qosqan sheksiz úlesin atap ótedi.
Ózbekstan Mádeniyat hám kórkem ónerdi rawajlandırıw qorı keń kólemli kórgizbe joybarlarınıń avtorı boldı.
Evropa mámleketleri, AQSh, Avstraliya jetekshi ǵalaba xabar qurallarınıń itibarı, sonday-aq, xalıqaralıq kórgizbeler sebepli Nókis kórkem óner muzeyi fenomeni búgingi kúnde pútkil dúnyaǵa belgili. Igor Savickiy atındaǵı Qaraqalpaqstan Respublikası mámleketlik kórkem óner muzeyi kollekciyasındaǵı shıǵarmalar Germaniya, Franciya, Italiya, Ispaniya, AQSh, Rossiya, Avstraliya, Niderlandiya, Qatar, Ázerbayjanda kórsetildi.
Muzey salon-dúkanında talantlı jergilikli ónermentlerdiń qolı dóregen hár qıylı suvenir ónimleri usınıs etilgen. Hár bir ónim Qaraqalpaqstannıń biytákirar mádeniy miyrası ortalıǵın sáwlelendiredi, bul bolsa sizge usı ájayıp aymaqtıń bir bólegin ózińiz benen alıp ketiw imkaniyatın beredi.