Sayohat - bu sarguzasht. Atrof-muhitning o‘zgarishi his-tuyg‘ularni uyg‘otadi, muammolardan chalg‘ishga, tashvish yoki tushkunlik holatidan chiqishga va ishtiyoqni qaytarishga yordam beradi. Uyda bunday hissiy quvvat olishning, ko‘p hollarda, iloji yo‘q. Sayohat sizga mutlaqo yangi narsalarni o‘rganish imkoniyatini beradi. Tabiiy va me’moriy go‘zalliklardan bahra olasiz, ular odatdagilardan shunchalik farq qiladiki, sizni aslo befarq qoldirmaydi. Siz boshqa madaniyat vakillarining an’analarini yaxshiroq bilib olasiz va dunyoning turli xalqlari taomlaridan tatib ko‘rishingiz mumkin bo‘ladi. Ko‘pincha sayohat yangi tanishlar orttirish ham demakdir. Natijada, siz yangi do‘stlar yoki shunchaki yoqimli suhbatdoshlarni topishingiz mumkin, ularning hikoyalari agar bir umr bo‘lmasa, ko‘p yillar davomida siz bilan qoladi.
O‘zbekiston Respublikasi Prezidentining 2024-yil 9-fevraldagi “Qoraqalpog‘iston Respublikasini kompleks ijtimoiy-iqtisodiy rivojlantirish va aholi bandligini ta’minlashga doir qo‘shimcha chora-tadbirlar to‘g‘risida”gi PQ-66-sonli Qarori ijrosini ta’minlash yuzasidan Respublikaga sayyohlar oqimini yanada oshirish uchun qulay shart-sharoitlar yaratildi.
2024-yil 3-iyundan “Uzbekistan Airways” milliy aviakompaniyasi Nukus – Istanbul – Nukus yo‘nalishi bo‘yicha to‘g‘ridan-to‘g‘ri reyslarni yo‘lga qo‘ydi. Yangi yoʻnalish boʻyicha parvozlar Nukus xalqaro aeroportidan “Airbus A320 Neo” samolyotlarida haftada bir marta – dushanba kunlari amalga oshiriladi.
“Uzbekistan Airways” samolyotlarida sayohat xizmat ko‘rsatish sifati yuqoriligi va qulayligi bilan ajralib turadi va o‘zining “Uzbekistan Airways Technics” texnik bazasi tufayli aviakompaniyaning har bir samolyoti parvozlar xavfsizligini yuqori darajada ta’minlaydi. “Uzbekistan Airways”ning yangi reyslari sayohatning nafaqat tez, balki yoqimli bo‘lishini ham ta’minlaydi.
2024-yil 1-iyundan boshlab har chorshanba va shanba kunlari Nukus – Olmaota – Nukus yo‘nalishi bo‘yicha parvozlar amalga oshiriladi. Aviachiptalarni eng yaxshi aviakompaniyalardan birida, eng qulay parvoz sharoitlari va maqbul narxlarda www.uzairways.com sayti va aeroportdagi maxsus kassalarda xarid qilishingiz mumkin.
Barcha ekoturizm ishqibozlari va Orol dengizini o‘z ko‘zlari bilan ko‘rish istagida bo‘lganlar uchun 2024-yil 1-apreldan boshlab dushanba, juma va yakshanba kunlari Nukus – Mo‘ynoq – Nukus yo‘nalishi bo‘yicha parvozlar Qoraqalpog‘iston Respublikasi ichidagi reyslar uchun mo‘ljallangan L-410 samolyotida amalga oshiriladi. Aviakompaniyaning silk-avia.com veb-saytida, Silk Avia ilovasida, O‘zbekistonning barcha xalqaro aeroportlarida, shuningdek, Uzbekistan Airways Sales filialida parvozlar jadvali bilan tanishishingiz va aviachiptalarni xarid qilishingiz mumkin.
Hozirgi notinch zamonamizda va kundalik turmushimizda hayotning ta’mini yo‘qotmaslik uchun bizga yorqin taassurotlar va hissiyotlar juda zarur. Shuning uchun ham, sayohatni uzoq vaqtga ortga surmang –afsus qilmaysiz!