Usı jıldıń 14-sentyabr - 6-oktyabr kúnleri mámleketimizde birinshi márte áhmiyetli jarıs - futzal boyınsha Jáhán chempionatı bellesiwlerine miyman boladı.
Ózbekstan futbol associaciyası imaratında Jáhán chempionatın joqarı dárejede ótkeriw boyınsha ámelge asırılıp atırǵan jumıslar boyınsha tiyisli taraw qaniygeleriniń qatnasıwında ǵalaba xabar quralları hám keń jámiyetshilik wákilleri ushın baspasóz ánjumanı ótkerildi.
Onda Turizm komiteti hám Ózbekstan futbol associaciyasınan jarıstı ótkeriw boyınsha shólkemlestiriw komitetiniń aǵzaları qatnastı. Baspasóz ánjumanında dáslep, jarıstı keńnen úgit-násiyatlawǵa qaratılǵan videorolik prezentaciyası ótkerildi.
"Elimizde ótkeriletuǵın birinshi áhmiyetli mundial sheńberinde pútkil dúnyaǵa Ózbekstan turizmin keńnen úgit-násiyatlaw imkaniyatınan únemli paydalanmaqshımız. Jarıstı keńnen úgit-násiyatlaw maqsetinde tayarlanǵan videorolikti islep shıǵıwda birinshi gezekte onı tamasha etken hár qanday sırt elde Ózbekstan haqqında dáslepki túsinikler payda bolıwına itibar qaratıldı. Bir sóz benen aytqanda, milliy dástúrlerimizden kelip shıǵıp, futzal mundılı elimizdiń turizm imkaniyatları menen birlestirildi," dep óz pikirin bildirdi Turizm komitetiniń juwaplı xızmetkeri A.Maksumov.
Jáhán chempionatınıń qatnasıwshısı sıpatında mámleketimizge 23 mámleketten sporchılar delegaciyaları keledi. Bunnan tısqarı, jáhán chempionatın tikkeley Ózbekstannan sáwlelendiriw ushın 5 kontinent mámleketlerinen júzlegen jurnalistler hám blogerler keledi. Sonday-aq, óz jurtınıń futzalshıları ushın ıqlaspazlıq etiw maqsetinde bir neshe on mıńlap ıqlasbentlerdi mámleketimizde qabıl etiw kútilmekte.
Búgingi kúnde futzal jarısları ótkeriletuǵın hár bir qalada turistlerge xızmet kórsetiw boyınsha barlıq shárayatlar qayta kórip shıǵılmaqta. Sonday-aq, elimizdiń bir qatar tariyxıy orınları Samarqand, Xiywa, Qoqand, Shahrisabz sıyaqlı qalalarımız da ózinde turistler aǵımın qabıl etiwge tayar.
