Ózbekstan - Shıǵıs ertagi" atamasındaǵı "Russian Traveler" jurnalınıń arnawlı sanında mámleketimizde sayaxat etiw qaǵıydaları, siyrek ushırasatuǵın turistlik hám mádeniy jónelisler, elimizdiń gastronomiyalıq turizmi hám basqa da maǵlıwmatlar oqıwshılardıń húkimine usınıs etilgen.
Bul basılmada Ózbekstannıń barlıq wálayat hám qalalarına barıwdıń abzallıqları anıq mısallar menen tolıq kórsetip berilgen, sonday-aq, ózbek xalqınıń bay mádeniyatı, dástúrleri, taǵamları hám miymandoslıǵına itibar qaratılǵanın atap ótiw kerek.
Basılmada áyyemgi Ullı jipek jolı kesip ótken qalalarımız haqqındaǵı karta da basıp shıǵarılǵan. Atap ótiliwinshe, bul qalalar haqıyqıy mádeniyatlar kesilispesi wazıypasın atqarǵan. Olardan tórtewi - Samarqand, Buxara, Xiywa hám Shahrisabz YUNESKOnıń Ulıwma jáhán mádeniy miyrası obektleri dep járiyalanǵan.
Bunnan tısqarı, arnawlı sanda rossiyalı turistlerge Ózbekstanda dem alıwdı qalay ótkeriw, qaysı kurortlar barıwǵa arzıydı hám olar qay jerde jaylasqanı haqqında áhmietli maǵlıwmatlar keltirilgen. Jurnalda atap ótiliwinshe, Chimyon tawları tek ǵana Tyan-Shannıń qarlı qayalıqları, ǵoza hám alma baǵları, júzlegen suw tasları boylap seyil etiw emes, al shılıqta júziw sıyaqlı dem alıw túrlerin de usınıs etedi.
Tashkent qalasınan 120 km uzaqlıqta 2000 metr biyikliktegi taw baǵırında jaylasqan Urınǵash kólleri, atap aytqanda, Nefrit kólinde qızıqlı dem alıwǵa ayrıqsha itibar qaratılǵan. Sonday-aq, jıl dawamında suw temperaturası +36°C bolǵan, teńiz qáddinen 2800 metr biyiklikte jaylasqan Arashan kóller sisteması hám Jizzaq wálayatındaǵı Aydar kól haqqında áhmiуеtli maǵlıwmatlar qálemge alınǵan.
Arnawlı sonda, sonday-aq, Ózbekstandaǵı hár qıylı kewilashar ilajlar, milliy bayramlar atap ótilgen. Atap aytqanda, Nawrız bayramı, "Lázgi" xalıqaralıq ayaq oyını festivalı, sonday-aq, "Gastro Bazar" festivalı sıyaqlı dástúriy ózbek asxanasına baǵıshlanǵan gastronomiyalıq ilajlarǵa itibar qaratılǵan.
Sport ıqlasbentleri xalıqaralıq jarıslarǵa, muzıka ıqlasbentleri bolsa Samarqandtaǵı "Sharq taronalari" hám Qaraqalpaqstan Respublikasınıń Moynaq qalasında dástúriy tárizde ótkeriletuǵın "Stixiya" festivallarına barıwǵa shaqırılǵan.
Ózbekstan haqqındaǵı bul arnawlı san tek ǵana baspa túrde emes, al "Russian Traveler" jurnalınıń rásmiy saytı hám sociallıq tarmaqlardaǵı betlerinde de jaylastırıldı.
Rossiyanıń jetekshi turistlik baspası bolǵan "Russian Traveler" jurnalınıń sociallıq tarmaqlardaǵı jazıwshılarınıń sanı 2 milliondı quraytuǵının atap ótiw kerek. Jurnal rásmiy saytın bolsa hár ayda derlik 4 millionǵa shamalas adam tikkeley baqlap baradı.
Ózbekstanǵa baǵıshlanǵan arnawlı san 10 mıń nusqada basıp shıǵarıldı hám ol Rossiyanıń jetekshi turistlik operatorları, kompaniyaları, isbilermen toparlardıń wákilleri jáne Moskva qalasındaǵı aeroportlarında tarqatıldı.
Ózbekstan elshixanası usı jurnaldıń prezentaciyasın usı jılı Turizm komiteti janındaǵı "Milliy PR-orayı" menen birgelikte Moskva qalasındaǵı Xalıq xojalıǵı jetiskenlikleri kórgizbesindegi "Ózbekstan" 66-pavilyonında ótkeriwdi rejelestirmekte.
Juwmaq ornında aytqanda, "Russian Traveler" jurnalınıń usı sanında járiyalanǵan maqalalar, pikirler hám sayaxat boyınsha usınıslar mazmunı jaǵınan rossiyalı oqıwshılarǵa tek ǵana estetikalıq zawıq alıw emes, al Ózbekstannıń turistlik hám bay mádeniy miyrasına jańasha kózqaras penen qaraw imkaniyatın beredi.
Derek: "Dúnya" AA