Ózbekstan Respublikası Prezidentiniń "2025-2026-jıllarda turistler aǵımın keskin kóbeytiw hám turistlik xızmetler kólemin jedel keńeytiw arqalı turizmniń ekonomikadaǵı ornı hám áhmiyetin arttırıw ilajları haqqında"ǵı PP-87-sanlı Pármanında transshegaralıq birgeliktegi turistlik marshrutlardı keńeytiw maqsetinde "Túrkmenstan - Xorezm - Qaraqalpaqstan - Qazaqstan" jónelisinde turistlik koridor-xalqanı jaratıw belgilengen.
Usı Pármanǵa tiykarlanıp, transshegaralıq birge islesiw sheńberinde jańa turistlik jónelis - "Túrkmenstan - Xorezm - Qaraqalpaqstan - Qazaqstan" jónelisindegi turistlik koridor-xalqa islep shıǵıldı.
Turizm komiteti tiyisli shólkemler hám jeke menshik sektor wákilleri menen birgelikte bul jónelisti turistler ushın qolaylı, mazmunlı hám mádeniy bay kontentke iye etip qáliplestirdi. Jóneliste turistler tómendegi turizm túrleri menen tanısıw imkaniyatına iye boladı:
Gastronomiyalıq turizm - hár bir aymaqtıń milliy taǵamları menen tanısıw;
Ekoturizm - tábiyiy gózzallıqlar hám landshaftlar qushaǵında dem aliw;
Etnoturizm - xalıqtıń úrp-ádetleri, dástúrleri hám ónermentshilik úlgileri menen tanısıw;
Zıyarat turizmi - muqaddes zıyarat orınları hám tariyxıy-ruwxiy esteliklerdi zıyarat etiw.
Baǵdar sheńberinde YUNESKOnıń Dúnya júzilik miyrası dizimine kirgizilgen jáne milliy hám aymaqlıq áhmiyetke iye 15 ten aslam obekt qamtıp alınǵan. Sonıń ishinde:
Túrkmenstanda - Áyyemgi Marı qalası, Dárwaza gaz krateri, Góne Úrgensh;
Xorezmde - Iyshan qala, Dushan qala;
Qaraqalpaqstanda - I.V.Savickiy muzeyi, Qızıl qala, Shılpıq qala, Sultan Uvays Baba zıyarat ornı, Topıraq qala, Ayaz qala;
Qazaqstanda - Tarısh oypatlıǵı, Bozjıra oypatlıǵı, Shaqpaq Ata mavzoleyi, Sherqala tawı.
Bul turistlik aylanba tek ǵana sayaxat ıqlasbentleri ushın emes, al mádeniyat, tariyx, kórkem óner hám tábiyattı súyiwshiler ushın da shın mánisindegi jańalıq bolıwı múmkin. Sayaxatshılar hám turistlik shólkemlerge usı jónelis boyınsha óz betinshe yamasa turistlik toparlar quramında tákirarlanbas waqıyalarǵa bay sayaxatlardı shólkemlestiriw usınıs etiledi.