"BBC Travel" globallıq media portalınıń maǵlıwmatlarına bola, Ózbekstan 2025-jılı sayaxat etiw ushın eń jaqsı 25 jónelis dizimine kirdi.
Maqalada atap ótiliwinshe, turizm Ózbekstannıń ózine tán dástúrleri hám mádeniy miyrasın saqlaw strategiyasınıń áhmiyetli bólegine aylanıp barmaqta. Mámleket infrastrukturanı jedel rawajlandırmaqta: jańa miymanxanalar, joqarı tezliktegi temir jol marshrutları, ishki aviaqatnawlar hám jańalanǵan mádeniy orınlar sayaxatshılar ushın biytákirar imkaniyatlar jaratpaqta. Bulardıń barlıǵı ekonomikalıq ósiwdi xoshametlewge hám Ózbekstannıń tariyxıy hám mádeniy miyrasınıń sheksiz baylıǵın ashıp atırǵan turistlerdi tartıwǵa járdem bermekte.
Xabarda 90 nan aslam mámlekettiń, sonıń ishinde, Ullı Britaniya, Kanada hám Avstraliya puqaralarınıń Ózbekstanǵa vizasız keliwi sapar etiwdi sezilerli dárejede ápiwayılastıradı hám turistler ushın jańa imkaniyatlar esigin ashadı-delinedi.
Bunnan tısqarı, qońsı mámleketler menen shegaranı kesip ótiw biraz ańsatlastı. 2024-jıl noyabr ayında Qazaqstan hám Ózbekstandı baylanıstıratuǵın "Jipek jolı temir jolı sayaxatı" atamasındaǵı birinshi xalıqaralıq temir jol jónelisi iske qosıldı. Bul qolaylı jónelis turistlerge Ullı Jipek jolınıń izinen barıp, hár eki mámlekettiń biybaha tariyxıy hám mádeniy dıqqatqa ılayıq orınların erkin úyreniw imkaniyatın beredi. Bunday sayaxat tek ǵana eski sawda hám mádeniy almasıwlar ortalıǵına shıǵıw emes, al aymaqta mádeniy baylanıslardı keńeytiw hám turizmdi rawajlandırıw ushın jańa imkaniyatlar jaratadı, dep juwmaqlaǵan "BBC Travel."
Atap ótiw kerek, dizimge AQSh, Kanada, YAponiya, Italiya, Avstraliya, Marokko, Angliya hám basqa da mámleketler kirgizilgen.