|
Ózbekstan Respublikası Prezidentinin 2023-jıl 27-iyuldaǵı "Turizm baǵdarındaǵı reformalardı bunnan bılay da jedellestiriw hám tarawda mámleketlik basqarıw sistemasın nátiyjeli shólkemlestiriw ilajları haqqında"ǵı PQ-238-sanlı qararınıń orınlanıwın támiyinlew, sonday-aq, turizm tarawındaǵı isbilermenlik subektlerin mámleket tárepinen qarjılay qollap-quwatlaw sistemasın engiziw maqsetinde Ministrler Kabinetiniń 2024-jıl 7-sentyabrdegi 550-sanlı qararı tastıyıqlandı. Ministrler Kabinetiniń qararına bola, investorlarǵa jańa miymanxanalardı qurıw hám úskenelew ushın subsidiyalar ajıratılmaqta. Bul subsidiyalar, franchayzing haqqındaǵı shártnama tiykarında shólkemlerdi bir bólegin qarjılandırıw imkaniyatın da óz ishine aladı. Investorlar, sonday-aq, dúnyanıń belgili miymanxana brendleri menen birge islesiw arqalı royalti qárejetlerin mámleketlik byudjet esabınan qarjılandırıw imkaniyatına iye boladı. Sonıń menen birge, kategoriyası (juldız) bolmaǵan jaylastırıw orınları úsh hám onnan joqarı kategoriya (juldız) alǵanında muwapıqlıq sertifikatın rásmiylestiriw boyınsha qárejetler Turizmdi qollap-quwatlaw qorınıń qarjıları esabınan qaplanadı. Qurılıs hám paydalanıwǵa tapsırılǵan miymanxanalar ushın, eger xanalar sanı 50 hám onnan joqarı bolsa, olardıń qurılıs hám úskenelew qárejetleriniń bir bólegin mámleketlik byudjetten qarjılandırıw tártibi de belgilep qoyılǵan. Bul ilajlar investorlar ushın jańa imkaniyatlar jaratıp, mámlekette turizmniń rawajlanıwına úlken tásir kórsetedi. Mámleket tárepinen kórsetilip atırǵan qarjılay járdem, óz gezeginde, turizm infrastrukturasın bekkemlew hám jumıs orınların jaratıwda úlken áhmietke iye. Isbilermenler ushın anıq finanslıq shártler usınıs etiliwiı, Ózbekstannıń global turizm dúnyasındaǵı básekige shıdamlılıǵın arttırıwǵa xızmet etedi. Sonıń menen birge, mámleket tárepinen miymanxana xojalıǵın qollap-quwatlaw, miymanlardıń miymanxanadaǵı xızmetlerden paydalanıwın ańsatlastıradı hám mámlekettiń ekonomikalıq rawajlanıwın támiyinleydi.
Derek: Uzbektourism.uz |