Qıtay ǴXQda Ózbekstanǵa qızıǵıwshılıq artıp atırǵanı haqqında
Qıtaydıń jetekshi ǵalaba xabar quralları, sonıń ishinde, "People's Daily" hám "Beijing Youth Daily" gazetaları, sonday-aq, eń iri hám eń abıraylı mámleketlik málimleme agentligi "Sinxua" bólimi Ózbekstan menen turizm tarawındaǵı birge islesiwdi bekkemlewge baǵıshlanǵan maqalalar járiyaladı. Atap aytqanda, Pekinde "Qıtayda Ózbekstan turizm jılı"nıń ashılıw máresimi hám Qıtay-Ózbekstan turizm investiciya forumı ótkerilgeni haqqında xabar berildi.
Qıtay basılımlarınıń xabar beriwinshe, Ctrip kompaniyasınıń maǵlıwmatlarına bola, noyabr ayına kelip, bul kompaniya platforması arqalı Ózbekstanǵa kelgen turistlerdiń sanı ótken jılǵa salıstırǵanda 188 procentke artqan. Sayaxachılar tiykarınan Qıtaydıń Pekin, Shanxay, Chjeszyan, Guandun hám Czyansu sıyaqlı ekonomikalıq rawajlanǵan aymaqlarınan kelgen. Tiykarǵı sayaxachılıq toparlarınıń ózgeshelikleri Ózbekstannıń tólem qábileti joqarı bolǵan jaslar arasında barǵan sayın ǵalaba en jayıp baratırǵanın kórsetpekte. Ózbekstanǵa kelgen turistlerdiń 80% ten aslamı Platinum hám onnan joqarı kategoriyadaǵı platforma aǵzaları bolıp, 65% ten aslamı joqarı kategoriyalı miymanxanalarda qalıwdı abzal kórgen.
Maqalalarda sonday-aq, 1-dekabr kúni Ózbekstan hám Qıtay eki mámleket puqaraları ushın vizasız rejim engiziw haqqındaǵı kelisimge qol qoyǵanı atap ótilgen. Bul qádem eki tárepleme qatnasıqlardı rawajlandırıwda áhmiyetli basqısh bolıp, turistlik almasıwlar ushın jańa imkaniyatlar jaratadı hám eki mámleket xalıqları arasındaǵı baylanıslardı jáne de bekkemleydi.