Wanderlust Ózbekstandı 2025-jılı eń jaqsı turistlik mánziller dizimine kirgizdi

Wanderlust Ózbekstandı 2025-jılı eń jaqsı turistlik mánziller dizimine kirgizdi


Britaniyanıń sayaxatlarǵa qánigelesken "Wanderlust" jurnalı Ózbekstandı 2025-jılı sayaxat etiw ushın eń jaqsı mánziller dizimine kirgizdi.

Bul jurnal dizimine Singapur, BAÁ, Qatar, AQSh, Braziliya, Germaniya, Yaponiya, Malayziya, Avstraliya hám basqa da mámleketler hám regionlar kirgizilgen.

Ózbekstan bir neshe áhmiyetli sebeplerge baylanıslı kóbinese eń jaqsı turistlik jónelisler reytinglerinde joqarı orınlardı iyeleydi. Mámleket Ullı Jipek jolı menen tıǵız baylanısqan bay tariyxıy miyrasqa iye. Bul aymaqta  Samarqand, Buxara hám Xiywa sıyaqlı belgili áyyemgi qalalar jaylasqan bolıp, olar ózine tán arxitekturası, meshitleri, medreseleri hám maqbaraları menen turistlerdi ózine tartadı.

Bunnan tısqarı, Ózbekstan hár qıylı bay mádeniyatlarǵa iye bolǵan kóp milletli mámleket esaplanadı. Sayaxashılar tawlar, shóller hám kóllerdi óz ishine alǵan biytákirar tábiyǵıy kórinislerden zawıqlanıwı múmkin, bul orınlar payızlı dem alıw hám ekoturizm ushın júdá qolaylı esaplanadı.

Jergilikli xalıqtıń miymandoslıǵı hám jıllı júzliligi da mámleketti turistler ushın tartımlı etedi. Ózbekstan rawajlanǵan turistlik xızmetlerge iye bolıp, olarǵa miymanxanalar, restoranlar hám transport infrastrukturası kiredi.

Nátiyjede, Ózbekstan tariyxıy miyras, mádeniy dástúrler, tábiyǵıy gózzallıqlar hám jergilikli xalıqtıń qızǵın múnásibetin ózinde jámlegen umıtılmas sayaxatlardı usınıs etedi.