Turizm jahon iqtisodiyotining yetakchi sohalaridan biri hisoblanadi. Shu bois O‘zbekiston turizm sohasini zamonaviylashtirishga, rivojlantirishga hamda sayyohlik xizmatlarini xalqaro mezonlarga muvofiq tashkil etishga alohida e’tibor qaratmoqda. O‘zbekiston xalqaro tashkilotlar bilan hamkorlikni faol kengaytirmoqda va turizm sohasidagi hamkorlikni yanada chuqurlashtirish bo‘yicha tashabbuslar ilgari surmoqda.
O‘zbekiston o‘zining noyob tarixiy-madaniy merosi, geografik joylashuvi va barqaror ichki vaziyati tufayli ulkan sayyohlik salohiyatiga ega. 2000 km radiusda 21 mamlakatga chiqish imkonini beruvchi qulay geografik joylashuvi tufayli O‘zbekiston dunyoning yetakchi sayyohlik yo‘nalishlaridan biriga aylanishi mumkin.
O‘zbekistonda iqtisodiyotning asosiy drayveri sifatida turizmni rivojlantirish darajasini oshirish maqsadida mamlakat turizm sohasini rivojlantirish strategiyasi faol ishlab chiqilmoqda. Shu nuqtayi nazardan, turizm sohasida muvaffaqiyatga erishgan bir qator mamlakatlar tajribasi o‘rganildi. O‘zbekiston Respublikasi Prezidenti Administratsiyasining 2025-yil 23-yanvardagi topshirig‘iga muvofiq, Turizm qo‘mitasi xalqaro kompaniyalarni tajriba almashish va ilg‘or tajribalarni joriy etish uchun faol jalb qilgan holda 2040-yilgacha turizm sohasini rivojlantirish strategiyasini ishlab chiqishga kirishdi.
2025-yil 31-yanvarda Gruziyaning Reformatics konsalting kompaniyasi bilan shartnoma imzolandi, bu O‘zbekistonning jozibador sayyohlik maskaniga aylanish va o‘z sanoatini yuqori darajada rivojlantirishga bo‘lgan intilishini ta’kidlaydi.
Reformatics - bu konsalting kompaniyasi bo‘lib, 2012-yildan beri butun dunyo bo‘ylab davlat sektori yetakchilari bilan yaqindan hamkorlik qilib, ularga jadal iqtisodiy o‘sish formulalari va strategiyalarini, shuningdek, davlat siyosatiga innovatsion yondashuvlarni ishlab chiqishda yordam beradi. Kompaniya Gruziyaning sobiq bosh vaziri tomonidan tashkil etilgan bo‘lib, u islohotlarni o‘zining iqtisodiy islohotlar, biznes va boshqaruv bo‘yicha sobiq bosh maslahatchilari bilan birgalikda boshqaradi.
Reformatics kompaniyasi maslahatchilari O‘zbekistonga tashriflari doirasida barcha hududlarni, shu jumladan Qoraqalpog‘iston Respublikasini qamrab olgan holda mamlakatning sayyohlik salohiyatini chuqur tahlil qilmoqda.
Xorijlik mutaxassislar hududlarning turizm imkoniyatlari, istiqbolli yirik loyihalar, xalqaro hamkorlik imkoniyatlari, turizm sohasini yanada rivojlantirish strategiyalari aks etgan yorqin taqdimotlar bilan tanishdi.
Kompaniya ekspertlarining ishi har bir hududning kelajakdagi o‘sishi uchun salohiyatini aniqlashga qaratilgan. Hududlarning o‘ziga xos xususiyatlari va sayohatchilarning dolzarb ehtiyojlariga asoslangan turizm sohasini rivojlantirish bo‘yicha aniq yo‘nalishlar sifatli turistik takliflarni yaratishga yordam beradi. Bu, o‘z navbatida, yetakchi sayyohlik yo‘nalishlaridan biri sifatida O‘zbekistonning jozibadorligini oshirishga qaratilgan samarali strategiyalarni shakllantirishga salmoqli hissa qo‘shadi.
Kompaniya mutaxassislari beshta asosiy yo‘nalishni rivojlantirishni taklif qilmoqda: madaniy-tarixiy, gastronomik, "lyuks," ko‘ngilochar va innovatsion turizm. Bu esa yangi turistik mahsulotlarni yaratish, xizmat ko‘rsatish sifatini oshirish, investitsiyalarni jalb qilish va xalqaro miqyosda keng ko‘lamli marketing kampaniyalarini yo‘lga qo‘yishni talab etadi.
Sayyohlar oqimini ko‘paytirish va to‘lov qobiliyatiga ega sayyohlarni jalb qilish uchun kompaniya viza siyosatini yanada soddalashtirish, transport aloqalarini rivojlantirish, xalqaro reyslar geografiyasini kengaytirish, Toshkentni chetlab o‘tgan holda hududlar o‘rtasida to‘g‘ridan-to‘g‘ri aviaqatnovlarni yo‘lga qo‘yish kabi chora-tadbirlarni taklif qildi. Shuningdek, takliflar gastronomiya sohasini modernizatsiya qilish va oshpazlik ta’limini rivojlantirish, ko‘ngilochar va sarguzasht turizmini faollashtirish, shuningdek, marketing kampaniyalari orqali mamlakatning mashhurligini oshirish masalalarini qamrab olgan bo‘lib, bu sayyohlarni jalb qilish va investitsiya kiritish uchun yangi imkoniyatlar yaratadi. Hujjatni ishlab chiquvchilarning so‘zlariga ko‘ra, bu ichki turizmni yanada faol rivojlantirish imkonini beradi.
Reformatics konsalting kompaniyasi 2025-yil oxirigacha O‘zbekistonning 2040-yilgacha turizmni rivojlantirish strategiyasining yakuniy har tomonlama tahlilini taqdim etishni rejalashtirmoqda. Ushbu hujjat turizm sohasini yanada rivojlantirishning shaffof va samarali yo‘llarini shakllantirish uchun asos bo‘lib xizmat qiladi.