Turizm jáhán ekonomikasınıń jetekshi tarawlarınan biri esaplanadı. Sonlıqtan Ózbekstan turizm tarawın zamanagóylestiriwge, rawajlandırıwǵa hám turistlik xızmetlerdi xalıqaralıq normalarǵa muwapıq shólkemlestiriwge ayrıqsha itibar qaratpaqta. Ózbekstan xalıqaralıq shólkemler menen birge islesiwdi jedel keńeytpekte hám turizm tarawındaǵı birge islesiwdi jáne de tereńlestiriw boyınsha baslamalardı alǵa qoymaqta.
Ózbekstan óziniń biybaha tariyxıy-mádeniy miyrası, geografiyalıq jaylasıwı hám turaqlı ishki jaǵdayı sebepli úlken turistlik potencialǵa iye. 2000 km radiusta 21 mámleketke shıǵıw imkaniyatın beretuǵın qolaylı geografiyalıq jaylasıwı sebepli Ózbekstan dúnyanıń jetekshi turistlik baǵdarlarınan birine aylanıwı múmkin.
Ózbekstanda ekonomikanıń tiykarǵı drayveri sıpatında turizmdi rawajlandırıw dárejesin arttırıw maqsetinde mámlekettiń turizm tarawın rawajlandırıw strategiyası jedel islep shıǵılmaqta. Usı kózqarastan, turizm tarawında tabısqa erisken bir qatar mámleketlerdiń tájiriybesi úyrenildi.
Ózbekstan Respublikası Prezidenti Administraciyasınıń 2025-jıl 23-yanvardaǵı tapsırmasına muwapıq, Turizm komiteti xalıqaralıq kompaniyalardı tájiriybe almasıw hám aldınǵı tájiriybelerdi engiziw ushın jedel tartqan halda 2040-jılǵa shekem turizm tarawın rawajlandırıw strategiyasın islep shıǵıwǵa kiristi. 
2025-jıl 31-yanvarda Gruziyanıń Reformatics konsalting kompaniyası menen shártnamaǵa qol qoyıldı, bul Ózbekstannıń tartımlı turistlik mánziline aylanıw hám óz sanaatın joqarı dárejede rawajlandırıwǵa bolǵan umtılısın kórsetedi.
Reformatics - bul konsalting kompaniyası bolıp, 2012-jıldan berli pútkil dúnya boylap mámleketlik sektor jetekshileri menen tıǵız birge islesip, olarǵa jedel ekonomikalıq ósiw formulaları hám strategiyaların, sonday-aq, mámleketlik siyasatqa innovaciyalıq qatnaslardı islep shıǵıwda járdem beredi. Kompaniyaǵa ekonomikalıq reformalar, biznes hám basqarıw boyınsha óziniń burınǵı bas másláhátshileri menen birgelikte reformatiklerdi basqaratuǵın Gruziyanıń burınǵı bas ministri tárepinen tiykar salınǵan.
Reformatics kompaniyasınıń másláhátshileri Ózbekstanǵa saparları sheńberinde barlıq aymaqlardı, sonıń ishinde Qaraqalpaqstan Respublikasın qamtıp alǵan halda mámlekettiń turistlik potencialın tereń talqılamaqta.
Sırt elli qánigeler aymaqlardıń turizm imkaniyatları, perspektivalı iri joybarlar, xalıqaralıq birge islesiw imkaniyatları, turizm tarawın bunnan bılay da rawajlandırıw strategiyaları sáwlelengen jarqın prezentaciyalar menen tanıstı.
Kompaniya ekspertleriniń jumısı hár bir aymaqtıń keleshektegi ósiwi ushın potencialın anıqlawǵa qaratılǵan. Aymaqlardıń ózine tán ózgeshelikleri hám sayaxatshılardıń áhmiyetli talaplarına tiykarlanǵan turizm tarawın rawajlandırıw boyınsha anıq baǵdarlar sapalı turistlik usınıslardı jaratıwǵa járdem beredi. Bul, óz gezeginde, jetekshi turistlik baǵdarlardan biri sıpatında Ózbekstannıń tartımlılıǵın arttırıwǵa qaratılǵan nátiyjeli strategiyalardı qáliplestiriwge salmaqlı úles qosadı.
Kompaniya qánigeleri bes tiykarǵı baǵdardı rawajlandırıwdı usınıs etpekte: mádeniy-tariyxıy, gastronomiyalıq, "lyuks," kewilashar hám innovaciyalıq turizm. Bul bolsa jańa turistlik ónimlerdi jaratıw, xızmet kórsetiwdiń sapasın arttırıw, investiciyalardı tartıw hám xalıqaralıq kólemde keń kólemli marketing kompaniyaların jolǵa qoyıwdı talap etedi.
Turistler aǵımın kóbeytiw hám tólew qábiletine iye turistlerdi tartıw ushın kompaniya viza siyasatın jáne de ápiwayılastırıw, transport baylanısların rawajlandırıw, xalıqaralıq reyslerdiń geografiyasın keńeytiw, Tashkentten basqada aymaqlar arasında tikkeley aviaqatnawlardı jolǵa qoyıw sıyaqlı ilajlardı usınıs etti. Sonday-aq, usınıslar gastronomiya tarawın modernizaciyalaw hám aspazlıq bilimlendiriwin rawajlandırıw, kewil ashar hám waqıyalarǵa bay sayaxat turizmin jedellestiriw, sonday-aq, marketing kompaniyaları arqalı mámlekettiń tanılıwın arttırıw máselelerin qamtıp alǵan bolıp, bul turistlerdi tartıw hám investiciya kirgiziw ushın jańa imkaniyatlar jaratadı. Hújjetti islep shıǵıwshılardıń atap ótiwinshe, bul ishki turizmdi jáne de jedel rawajlandırıw imkaniyatın beredi.
Reformatics konsalting kompaniyası 2025-jıldıń aqırına shekem Ózbekstannıń 2040-jılǵa shekem turizmdi rawajlandırıw strategiyasınıń juwmaqlawshı hár tárepleme tallawın usınıwdı rejelestirmekte. Bul hújjet turizm tarawın bunnan bılay da rawajlandırıwdıń ashıq-aydın hám nátiyjeli jolların qáliplestiriw ushın tiykar bolıp xızmet etedi.