Ózbekstan Respublikası Turizm komiteti Ózbekstannıń Qıtaydaǵı elshixanasınıń qızǵın qollap-quwatlawı menen "Qıtayda Ózbekstan turizm jılı" sheńberinde mámleketimizdiń bay turistlik potencialın ǵalaba en jaydırıwǵa qaratılǵan keń kólemli ilajlardı ámelge asırıwdı dawam ettirmekte.
12-15-iyun kúnleri Gonkong kórgizbe orayında (HKCEC) ótkerilgen ITE Hong Kong 2025 (International Travel Expo) te Ózbekstannıń qatnasıwı jarqın waqıyalardan biri boldı.
Ózbekstan stendi kórgizbeniń haqıyqıy gáwharına aylandı. Stendte mámleketimizdiń bay mádeniy miyrası, dástúriy xalıq ónermentshiligi hám mámleketimizdiń turistlik potencialınıń ráńbáreńligin hám ózine tánligin sáwlelendiretuǵın zamanagóy turistlik baǵdarlar usınıldı.
Kórgizbege Aziya hám jáhán mámleketlerinen turistlik agentlikleri, aviakompaniyalar, investorlar hám ǵalaba xabar qurallarınıń wákilleri keldi. Ózbekstan stendi óziniń bay prezentaciyası, milliy muzıkası hám shıǵısqa tán miymandoslıq ruwxın sáwlelendiretuǵın janlı ortalıǵı menen keń qızıǵıwshılıq oyattı.
Ilaj sheńberinde xalıqaralıq birge islesiwshiler menen isbilermenlik ushırasıwları hám sóylesiwler bolıp ótti. Atap aytqanda, Gonkong mádeniyat hám Turizm komitetiniń baslıǵı menen ushırasıw shólkemlestirilip, Ózbekstan hám Gonkong arasındaǵı eki tárepleme birge islesiwdi bekkemlew hám turizm almasıwın keńeytiw perspektivaları dodalandı.
"ITE Hong Kong" xalıqaralıq turizm kórgizbesinde, sonday-aq, usı jılı 16-20-iyun kúnleri Makao, Fuchjou, Uxan hám Shenchjen qalalarında shólkemlestirilgen "road-show"da mámleketimizdiń úlken turistlik potencialı, sonıń ishinde, tariyxıy hám mádeniy estelikleri, milliy dástúrleri hám úrp-ádetleri tanıstırıldı.
Tashkent qalası, Tashkent, Xorezm wálayatları hám Qaraqalpaqstan Respublikası turistlik shólkemleri hám turoperatorları tárepinen Ózbekstannıń turizm potencialın kórsetiw, xalıqaralıq birge islesiwdi keńeytiw, turistler aǵımın kóbeytiw hám turizm infrastrukturasın rawajlandırıwǵa qaratılǵan prezentaciyalar ótkerildi.
Qıtaydan Ózbekstanǵa turistler aǵımın kóbeytiw maqsetinde "road-show" sheńberinde turizm biznesiniń jetekshi wákilleri ushın "B2B" sessiyalar shólkemlestirildi, bul bolsa isbilermenlik baylanısların keńeytiw hám jańa sherikliklerdi ornatıw ushın siyrek ushırasatuǵın imkaniyatlardı ashtı. 
Ushırasıwlarda turizm tarawındaǵı birge islesiwdiń perspektivalı baǵdarları dodalandı hám turizm, mádeniy almasıw hám investiciyalıq joybarlar tarawında birgeliktegi jumıslardıń anıq mexanizmlerin islep shıǵıw boyınsha kelisimlerge erisildi, delegaciyalardıń almasıwın jolǵa qoyıw hám turizm baslamalarında óz-ara qatnasıw máseleleri kórip shıǵıldı.
