2025-jıl 28-31-may kúnleri Qaraqalpaqstan Respublikasında "Aral teńizine poezd" keń kólemli jaslar ekologiyalıq akciyası bolıp ótti. Bul baslama Ózbekstan Respublikası Ekologiya, qorshaǵan ortalıqtı qorǵaw hám ıqlım ózgeriwi ministrligi, Turizm komiteti, Joqarı bilimlendiriw, ilim hám innovaciyalar ministrligi, Qaraqalpaqstan Respublikası Ministrler Keńesiniń járdeminde ámelge asırıldı.
Akciya Ózbekstannıń barlıq wálayatlarınan kelgen 500 belsendi hám intalı jigit-qızlardı birlestirdi.
Akciya qatnasıwshıları óz sayaxatların Aralboyı aymaǵınıń bay mádeniy miyrası menen tanısıwdan basladı. Olar I.V.Savickiy atındaǵı Qaraqalpaqstan mámleketlik kórkem óner muzeyi hám Nókis qalasındaǵı Qaraqalpaqstan tariyxı hám mádeniyatı mámleketlik muzeyinde bolıp, ózine tán kórkem óner hám tariyx ortalıǵına bólendi.
Akciya baǵdarlaması sheńberinde miymanlar Berdaq atındaǵı Qaraqalpaq mámleketlik universitetine jol aldı hám ol jerde "Biz bir shańaraq perzentlerimiz!" jarqın xalıqlar doslıǵı festivalı bolıp ótti. Bul ilaj keńpeyillik hám aymaq keleshegi ushın ulıwma juwapkershilik ruwxı menen birlesken túrli mádeniyat wákillerin birlestirgen awızbirshilik hám tınıshlıq tımsalına aylandı.
"Doslıq" kanalınıń sulıw jaǵasında respublika xalqı hám wálayattıń mirát etilgen miymanları ushın koncert baǵdarlaması qoyıp berildi. Muzıka sesleri hám jaqtılıq illyuminaciyalarında kóterińki keypiyat ortalıǵı jaratılıp, barlıq qatnasıwshılarda kesheden jaǵımlı estelikler qaldırdı.
Jaslar "Aral - biziki" joybarı sheńberinde Moynaqqa da bardı. Bul jerde olar Aral teńizi tariyxı muzeyi, belgili kemeler qabırstanı hám aymaqtaǵı keń kólemli ekologiyalıq apatshılıqtı esletiwshi estelik kompleksleri menen tanıstı.
Akciya dawamında tábiyattı qorǵaw baǵdarındaǵı ámeliy ilajlarǵa ayrıqsha itibar qaratıldı. "Jasıl mákan" ulıwma milliy joybarı sheńberinde studentler "Aral Forest" hám "Green Aral Sea" ekologiyalıq baǵdarlamalarında qatnasıp, shor hám qumlı sharayatlarǵa shıdamlı ósimliklerdi ekti. Bul háreketler Aralboyı aymaǵında ekosistemalardı tiklew hám shólleniwge qarsı gúresiwge qaratılǵan edi.
Bunnan tısqarı, akciya qatnasıwshıları ekologiya, klimat ózgeriwi hám turaqlı turizm temalarında prezentaciyalar tayarladı. Olar oqıw seminarları hám treninglerden ótip, aymaqtaǵı ekologiyalıq jaǵdaydı jaqsılaw boyınsha óz-ara tájiriybe hám usınıslar almastı.
"Aralǵa poezd" joybarı Ózbekstanda ekologiyalıq turizmdi rawajlandırıw jolındaǵı áhmiyetli qádem boldı. Ol tábiyattı qorǵaw hám mádeniy aǵartıwshılıqtı úylestirip, jaslardı biytákirar Aralboyı aymaǵın úyreniw hám qásterlep saqlawǵa qarattı.
Bul áhmiyetli baslama Aralboyınıń áhmiyetli mashqalalarına itibardı qaratıw hám jaslarda ekologiyaliq máselelerge sanalı múnásibetti qáliplestiriw, sonday-aq, aymaqtıń tábiyǵıy miyrasın saqlaw hám tiklewde belsene qatnasıwǵa qaratılǵan. Akciya tek ǵana Aral teńizi mashqalalarına itibar qaratıp qoymastan, al ekologiyalıq sanalı hám sociallıq belsendi puqaralardıń jańa áwladın qáliplestirdi.
