Aral teńizi boyında jańa turistlik kompleks jaratılmaqta

Búgingi kúnde Qaraqalpaqstan Respublikasında jergilikli hám shet elli turistlerdi elimizge qızıqtırıw maqsetinde Etnoturizm, Ekoturizm, Gastronomik turizm, Tariyxıy-mádeniy turizm kibi bir qatar turistlik jónelisler jedel rawajlanıp barmaqta. Atap otiw kerek, solar qatarında Ekoturizm jónelisi ayrıqsha orınǵa iye. Qaraqalpaqstannıń ózgeshe ekologiyalıq sharayatı, aymaqta jaylasqan tábiiy obektler, atap aytqanda Tómengi-Ámiwdarya mámleketlik biosfera rezervati, Sudoche kóli, Aqshakól kóli, Aral teńizi hám Ústirt tekisligi búgingi kúnde elimizge kelip atırǵan miymanlarda úlken qızıǵıwshılıq oyatpaqta. Turistlerge xızmet kórsetiw hám infrastruktura qolaylıqların jaratıw maqsetinde jergilikli turistlik kárxanalar hám xızmet kórsetiw tarawındaǵı basqa da isbilermenler tárepinen bul obektlerde jańa joybarlar ámelge asırılmaqta. Mısalı retinde, “JASMINE GOLD GROUP” JShJ tárepinen Aral teńizi boyında Jańa turistlik kompleks jaratılmaqta. Ulıwma bahası 4mlrd swmdı quraǵan bul joybardıń maydanı 100 gektardan ibarat. Moynaq rayonı orayınan 170-180km qashıqlıqta jaylasqan bul komplekste qara úyler, shertekler, xızmet kórsetiw imaratları, sanitar-gigienik shaqapshaları, piyadala jolı qurıladı. Qaraqalpaqstan Respublikası Turizm hám sport bas basqarmasınıń málimleme xızmeti