Janar may quyıw shaqapshalarına qoyılǵan talap múddeti uzaytırıldı.

Ózbekstan Respublikası Ministrler Kabinetiniń 2019-jıl 21-sentyabrdegi “Jol boyı hám turistik infrastrukturanı jáne de rawajlandırıw ilajları haqqında”ǵı 793-san sheshimine muwapıq, 2020-jıl 1-marttan baslap jámiyetlik maqsetlerine mólsherlengen hám kún dawamında isleytuǵın, sanitariya hám qalasazlıq normaları hám qaǵıydaları talaplarına juwap beretuǵın sanitariya-gigiena shaqapshaları menen úskenelenbegen avtomobillerge gaz toltırıw kompressor stanciyaları (AGTKS), avtomobillerge gaz quyıw stanciyaları (AGQS) hám avtomobillerge janar may quyılıw stanciyaları (AJQS) nıń iskerlik kórsetiwine jol qoyılmawı belgilengen.

Koronavirus pandemiyasınıń unamsız tásirin turizm hám oǵan tikkeley baylanıslı bolǵan tarmaqlardı qollap-quwatlaw arqalı kemeytiw, ámeldegi sanitariya-epidemiologiyalıq jaǵdaydan kelip shıqqan halda turizm salasın qayta tiklew hámde isbilermenlik subyektlerine qosımsha qolaylıq jaratıw maqsetinde Ministrler Kabinetiniń 2020-jıl 10-iyuldaǵı “Ózbekstan Respublikasında turizm salasın qayta tiklew hám rawajlandırıw ushın qolay shárt-shárayatlardı jaratıw ilajları haqqında”ǵı 433-san sheshimine muwapıq, jámiyetlik maqsetlerine mólsherlengen hám kún dawamında isleytuǵın, sanitariya hám qalasazlıq normaları hám qaǵıydaları talaplarına juwap beretuǵın sanitariya-gigiena shaqapshaları menen úskenelenbegen AGTKS, AGQS hám AJQS lardıń 2020-jıldıń 1-sentyabrden iskerlik kórsetiwine jol qoyılmawı belgilengen.

Sonnan kelip shıqqan halda, AGTKS, AGQS hám AJQS aymaǵında sanitariya hám qalasazlıq normaları hám qaǵıydaları talaplarına juwap beretuǵın sanitariya-gigiena shaqapshaları menen úskenelenbewlik hámde Respublika hám Aymaqlıq jumısshı topar aǵzaları tárepinen anıqlanǵan kemshiliklerdiń 2020-jıldıń 1-sentyabrine shekem jónge salınbawlıǵı:

  • “Óztransgaz” AJ hám “Aymaqgaztaminot” AJ aymaqlıq bólimleri tárepinen – AGTKS larǵa gaz jetkiziwdi waqtınsha toqtatıw;
  • “Ózbekneftgaz” AJ aymaqlıq neft bazaları tárepinen - anıqlanǵan kemshilikler tolıq jónge salınbaǵansha AJQS larǵa neft ónimleri jetkiziwdi waqtınsha toqtatıw yamasa Ministrler Kabinetiniń 1998-jıl 18-sentyabrdegi “Avtomobil' janılǵısı quyıw shaqapshalarınıń jumısın jetilistiriw hám Respublika qarıydarların neft ónimleri menen támiyinlewdi jaqsılaw ilajları haqqında” ǵı 397-sanlı sheshimi talaplarına muwapıq neft ónimleri jetkiziw shártnamasın biykarlaw;
  • Neft, gaz hámde gaz kondensatın tabıw, qayta islew hám satıw, magistral gaz trubaları, neft trubaları hám neft' ónimleri trubaların proektlestiriw, qurıw, olardan paydalanıw hám olardı ońlaw boyınsha iskerlikti litsenziyalaw komissiyası tárepinen - litsenziya talapları hám shártleri belgilengen tártipte atqarılmaǵanlıǵı munasábeti menen AGTKS hám AJQS lar arqalı qısılǵan hám suyultirilgan gazdı satıw iskerligin ámelge asırıw litsenziyasınıń ámel etiwin toqtatılıwı múmkinligin belgileydi.