Kishi Qiriq Qiz qala

Kishi Qırıq Qız qala esteliginiń fortifikatsiyalıq qurılısı (b.e.sh. IV–III áá.) bir-biri menen tutasıp turǵan hár qıylı formadaǵı batıs hám shıǵıs bólimlerinen ibarat. Úlken Qırıq Qız qala esteliginen onsha qashıq bolmaǵan jerde jaylasqan Kishi Qırıq Qız qala shegaradaǵı qorǵan bolıp, oazis shetindegi qorǵanıw sistemasınıń quram bólegi bolǵan. Bul jerde jaylasqan garnizon dushpannıń bastırıp kirgeni jóninde eskertiw ushın ot jaǵıp xabar bergen bolıwı itimal. Bazı ilimpazlardıń pikiri boyınsha, Kishi Qırıq Qız qala sıyaqlı shegaradaǵı qorǵanlar Xorezmniń arqa tárepinde gezip júriwshi kóshpeli xalıqlar menen sawda-satıq hám zat almasıw orayı sıpatında qosımsha xızmet te atqarǵan. Estelik b.e. III á. – IV á. basında qańırap qalǵan.